Featured post

ലൈഫ്ബോയ് എവിടയാനാവിടേയാണാരോഗ്യം 😍 ,” ചേട്ടൻ പാടോ”

“ നന്നായി പാടും ,”

ജോജോ , താങ്കളെ ഞാൻ “ജോസഫ് “ എന്ന് വിളിയ്ക്കാൻ ആഗ്രഹിയ്ക്കുന്നു . കാരണം ഞാൻ താങ്കൾക്കൊപ്പം ചിലവഴിച്ച സമയമത്രയും ജോസഫ് നെ മാത്രമേ എനിയ്ക്കു കാണാൻ കഴിഞ്ഞുള്ളു .

ഞാൻ ഒരിയ്ക്കലും ഒരു നല്ല നിരൂപകനല്ല . സിനിമയും ആയി യാതൊരു വിത ബന്ധവുമില്ല . സിനിമ കാണും , നല്ലതാണെങ്കിൽ ആസ്വദിയ്ക്കും . നല്ലതല്ല എങ്കിൽ സ്വയം പഴിയ്ക്കും , തലവച്ചതിനു .

.”വ്യത്യാസമുള്ള കഥാതന്തു “ എന്ന് സുഹൃത്ത് പറഞ്ഞതിൻപ്രകാരം “ജോസഫ് “ കാണാൻ കുടുംബസമേതം പോയി.

ശ്രീമതി ഓൺലൈൻ റിവ്യൂ ഒക്കെ വായിച്ചിട്ടു ഇതേ അഭിപ്രായം പറഞ്ഞു . എന്നാൽ ശെരി പോയേക്കാം .അങ്ങനെ നാലുമണിയ്ക്കുള്ള ഷോയ്ക്കു കയറി . നേരെ പിടിച്ചു ഇരുത്തിയാൽ 2 വരിയിൽ കൂടുതൽ ഇരിയ്ക്കാനുള്ള ആൾക്കാർ ഉണ്ടാകില്ല . ചിലപ്പോ ആ സമയം , വർക്കിംഗ് ഡെയ് ഒക്കെ ആയിട്ടാകാം .

സിനിമ തുടങ്ങി അവസാനിയ്ക്കുന്നതുവരെ ജോസഫ് തകർത്തു .സപ്പോർട്ടിങ് ആക്ടർസ് , അതിലേറെ .കഥയും ,ജോസഫ് പാട്ടിലും പുറകിലായിരുന്നില്ല .ഭയങ്കര മേക്ക്ഓവർ . ജോസഫ് എന്ന കഥാപാത്രത്തിന് എന്ത് വേണം എന്നത് ചിത്രത്തിലുടനീളം ഉണ്ട് .

നായകന്റെ അതിസാമർഥ്യങ്ങളൊന്നും ഇല്ലാതെ ,വളരെ സിമ്പിൾ ആയി , ആകാംഷയുടെ മുൾമുനയിൽ നിർത്തി , ജോസഫ് നെ നമ്മുടെ ഇടയിലേക്ക് വിട്ടു തന്ന് സിനിമ അവസാനിപ്പിച്ചു . ഒരായിരം ചോദ്യങ്ങൾക്കു മറുപടി നമ്മൾ കണ്ടെത്തണം ,ചില വലിയ ഓർമപ്പെടുത്തലുകളിലൂടെ രണ്ടായിരത്തിപതിനെട്ടു കണ്ട മറ്റൊരു നല്ല സിനിമയിലൂടെ , വലിയ അവകാശവാദങ്ങളില്ലാത്ത പുതിയൊരു നല്ല നായകനിലൂടെ .

കാണാത്തവർ തീർച്ചയായും കാണണം ,നല്ലൊരു പ്രമേയം ,നല്ല കുറെ അഭിനേതാക്കൾ , ജോസഫ് 100 % നീതിപുലർത്തും .ജോജോ യുടെ കരങ്ങളിൽ “ജോസഫ്” ഭദ്രം . ഇദ്ദേഹത്തിന് വേണ്ടി ഇനി കഥയെഴുതുന്ന എഴുത്തുകാരും , പടമെടുക്കാൻ കാത്തിരിയ്ക്കുന്ന സംവിധായകരും രണ്ടുവട്ടം ആലോചിയ്ക്കേണ്ടി വരും .

കഴിഞ്ഞുപോയ സിനിമകളിൽ താങ്കളെ പൂർണമായും ഉപയോഗിയ്ക്കാൻ കഴിയാതെ പോയതിൽ , ഇന്ന് ചിലപ്പോൾ ദുഃഖിക്കുന്ന സംവിധായകരുണ്ടാകും ,അതാണ് താങ്കളുടെ അവാർഡും . 👍

NB – ഇത് എന്റെ ആംഗിൾ ഇൽ ഞാൻ കണ്ടതാണ് , നിങ്ങളുടെ ആംഗിളിൽ നിങ്ങൾ കാണുമ്പോൾ എന്തെങ്കിലും തെറ്റുകുറ്റങ്ങൾ ശ്രദ്ധയിൽപെട്ടാൽ , അതുനിങ്ങളുടെ ആംഗിൾ ന്റെ പ്രശ്നമായി കരുതി ക്ഷമിയ്ക്കുക .

Advertisements
Featured post

ചെറുമോൻ സ്റ്റാർ ആണേൽ അപ്പുപ്പൻ സൂപ്പർ സ്റ്റാറാ.

എല്ലാപേർക്കും അവരവരുടെ കുട്ടികൾ ‘സൂപ്പർ കിഡ്സ് ‘ആണ് ,പഠിത്ത കാര്യങ്ങളിൽ മാത്രമല്ല പാഠ്യേതര കാര്യങ്ങളിലും .കുട്ടികൾ ഇല്ലാത്തവർക്ക് ,അവരുടെ വേണ്ടപ്പെട്ടവരുടെ കുട്ടികൾ .കഴിഞ്ഞ ദിവസം സ്കൂൾ ബസ് ഇൽ നിന്ന് ഇറങ്ങിയ മകന്റെ സന്തോഷം ,അവന്റെ സ്കൂൾ ഐഡി ടാഗ് ഇൽ ഒരു “ എ സ്റ്റാർ “ ബാഡ്ജ് പിൻ ചെയ്‌തേയ്ക്കുന്നു . ചാടി ബസിൽ നിന്ന് ഇറങ്ങിയ ഉടനെ അതിന്റെ ചരിത്രം പറഞ്ഞു . ഇപ്പൊ ഇതൊരു പോസ്റ്റ് ഇടാൻ തക്ക കാര്യമൊന്നുമല്ല , കാരണം ഇപ്പോഴത്തെ കുട്ടികൾ വളരെ ഏറെ കഴിവുകൾ ഉള്ളവരാണ് . പഴയ കാലമൊന്നുമല്ല . എല്ലാ രക്ഷാകർത്താക്കളെയും പോലെ ഒരു സന്തോഷം ഞങ്ങൾക്കും തോന്നി. പക്ഷെ മകന്റെ സന്തോഷം കാണാൻ ഒരു രസമായിരുന്നു . അന്നേദിവസം മേല്കഴുകുന്ന സമയതല്ലാതെ ,മുഴുവൻ സമയവും അവൻ ആ ഐഡി കഴുത്തിൽ തൂകി ഇട്ടു നടന്നു .

ഇടയ്ക്കു ആത്മനിർവൃതി അടയുമ്പോൾ സ്വയം ചോദിയ്ക്കും “ ശോ വാപ്പച്ചീ ഇതെങ്ങനെയാ എനിയ്ക്കു കിട്ടിയത് “ ഒപ്പം ഒരു കള്ളചിരിയും കാണും . അവന്റെ ആവേശം കൂടിയപ്പോൾ അന്ന് രാത്രിതന്നെ അവന്റെ അപ്പൂപ്പനെയും , അമ്മൂമ്മയേയും ഇതൊന്നു കാണിയ്ക്കണം .സാധാ ഫോൺ ആയതിനാൽ വാട്സ്ആപ്പ് ഒന്നും 2 പേർക്കും ഇല്ല . എന്നാൽ ശെരി ഒന്ന് ഫോൺ വിളിച്ചു കാര്യം പറയാം എന്ന് കരുതി .അവൻ തന്നെ എന്റെ ഫോൺ എടുത്തു , എമർജൻസി നമ്പറിൽ നിന്ന് അവന്റെ അമ്മൂമ്മയെ ഡയൽ ചെയ്തു . ഫോൺ എടുത്തയുടനെ വിശേഷങ്ങൾ ചോദിയ്ക്കുന്നതിനുപകരം ഒറ്റ ഡയലോഗ് ഇൽ കാര്യങ്ങൾ അവതരിപ്പിച്ചു .അവർ സന്തോഷം കൊണ്ട് “ കൊള്ളാല്ലോ മോനെ , അതെങ്ങനെയാ ഇരിയ്ക്കുന്നെ “ . അവൻ അതിന്റെ ഷേപ്പ് ഒക്കെ വിവരിച്ചു .രക്ഷയില്ല എന്ന് കണ്ട അവൻ ഒരു അഭിപ്രായം പറഞ്ഞു “ നമുക്ക് ഉപ്പയെയും ഉമ്മായെയും ഇത് കാണിയ്ക്കാൻ പോയാലോ? “ ഞാൻ ഞെട്ടി . വമ്പൻ പണിയായിപ്പോയീ . സന്തോഷം കെടുതണ്ടാണ് കരുതി ശെരി വച്ചു. അങ്ങനെ കാർ ഇൽ എല്ലാപേരും കയറി ഒരു നൈറ്റ് ഡ്രൈവ് . അവർക്കും സന്തോഷമായി .പെട്ടെന്ന് തന്നെ തിരികെ വരുകയും ചെയ്തു .

അടുത്ത ദിവസം വൈകുന്നേരം ഒരു കാൾ വന്നു , അവന്റെ അപ്പൂപ്പനാ “ മോനെ എവിടെയാ ?”

ഞാൻ “ വീട്ടില “.

“ഒന്ന് പകുതിവരെ വരാമോ ഞാൻ ഒരു സാധനം തരാം , അവിടെ വരെ വന്നാൽ വീട്ടിന്റെ മുന്നിലൂടെ ഉള്ള ബസ് കിട്ടില്ല “

ഞാൻ – “ അതിനെന്താ വരാല്ലോ “

ഞാൻ റെഡി ആയി പറഞ്ഞ ബസ് സ്റ്റോപ്പ് ഇൽ എത്തി .ചെറിയ ശാരീരിക പ്രശ്നങ്ങൾ ഉണ്ടെങ്കിലും ആള് ഭയങ്കര കൃത്യനിഷ്ടക്കാരനാ , ഞാൻ എപ്പോഴെത്തെയും പോലെ 10 മിനിറ്റ് ലേറ്റ് .എത്തിയ ഉടനെ ഒരു കവർ എന്റെ നേരെ നീട്ടിയിട്ടു “ഇത് മോന് കൊടുക്കണം “. അപ്പൊ ഞാൻ ചോദിച്ചു “ ഞാനും മോൻ ആണ് “. മറുപടി വലിയ താമസമില്ലാതെ വന്നു “ തടിയന്മാർക്കുള്ളതും അതിലുണ്ട് “.

ഞാൻ “ സന്തോഷം “.

ഞാൻ ബസ് കയറ്റി വിട്ടിട്ടു വീട്ടിലേയ്ക്കു വന്നു .വന്നപാടെ ഞാൻ കവർ മോന്റെ കയ്യിൽ കൊടുത്തു . അതിനകത്തു വർണ്ണക്കടലാസിൽ പൊതിഞ്ഞ ഒരു പൊതി . അവൻ അതെടുത്ത ഉടനെ “ ഉപ്പ എനിയ്ക്കു ഗിഫ്റ്റ് തന്നത “. അവൻ സന്തോഷം കൊണ്ട് ചിരിയ്ക്കുന്നു . പാക്കിങ് തുറന്നു നോക്കിയായപ്പോൾ 2 ചോക്ലേറ്റ് പാക്കറ്റ് , ഒപ്പം ഒരു തടിയിലെ ഹൗസ് ബോട്ട് , അതിന്റെ താഴെയായി ഒരു പേപ്പർ ഇൽ ഒരു കുറിപ്പും “ NEHAN ANEES A * GRADE “.ഒരു 100 രൂപ യുടെ നോട്ട് അതിന്റെ ഇടയിൽ തിരുകി വച്ചിരിയ്ക്കുന്ന .ഇപ്പോഴും വീട്ടിൽ വന്നാൽ കയ്യിലൊരു പൊതി കാണും . പക്ഷെ ഇത്തവണ ഞെട്ടിച്ചു കളഞ്ഞു . കാരണം ഇത് ഒപ്പം ജോലി ചെയ്യുന്ന ആരെയോ കൊണ്ട് ചെയ്യിച്ചതാണ് . മൊത്തത്തിൽ സന്തോഷം . അപ്പൊ തന്നെ മോന്റെ കമന്റ് വന്നു “ ഉപ്പ ആള് കൊള്ളാം അല്ലെ ?”

ഞാനും ഓർത്തു “ ഒരു രൂപ മുതൽ 10 രൂപ വരെ കാലഘട്ടത്തിനനുസരിച്ചു എനിയ്ക്കു തന്നിരുന്ന എന്റെ അപ്പൂപ്പയെ “.

അശരീരി “ കണ്ടു പടിയ്ക്കു മനുഷ്യ .നിങ്ങളാപ്രായത്തിൽ എന്തെങ്കിലും ക്രീയേറ്റീവ് ആയി ചിന്തിയ്ക്കോ എന്തോ ?”

Featured post

പിറന്നാൾ സമ്മാനം

സ്വന്തം പിറന്നാൾ പണ്ടുമുതലേ എനിയ്ക്കൊരു ഹരം ആയിരുന്നില്ല .ഇത്തവണയും അങ്ങനെ തന്നെയാകുമെന്നു ഞാൻ കരുതി . അതിരാവിലെ തന്നെ ശ്രീമതിയും മകനുമൊക്കെ പിറന്നാൾ ആശംസകൾ പങ്കുവച്ചു . പക്ഷെ എന്നെ എന്റെ മകൻ അഭിസംബോധന ചെയ്തത് “ബർത്ത് ഡേ ബോയ് “ എന്നായിരുന്നു .അതെനിയ്ക്കു ഇഷ്ടായി , ഒപ്പം അവൻ എനിയ്ക്കൊരു ഗിഫ്റ്റ് ഉം തന്നു , സ്റ്റാർ വാഴ്സ് പാവാടയ്ക്കു ശേഷം അവന്റെ പുതിയ കലാസൃഷ്ടി വീടും , മരവും , നദിയുമൊക്കെ ഉള്ള ഒരു പെയിന്റിംഗ് . എന്നെ പിടിച്ചു കുലുക്കിയത് നദിയുടെ കരയിൽ കിടക്കുന്ന ക്യാപ്റ്റൻ അമേരിക്കയുടെ ശീൽഡ് ആയിരുന്നു .

ഗിഫ്റ്റ് തന്നതെല്ലാം അവൻ എനിയ്ക്കു വിവരിച്ചു തന്നു , ഞാൻ കൊള്ളാം ,നന്നായിട്ടുണ്ട് എന്നൊക്കെ ഉള്ള വാക്കുകൾ കൊണ്ട് അടുത്ത കലാസൃഷ്ടിക്കുള്ള വളം അവനിലേക്ക്‌ വർഷിച്ചു . എല്ലാം കഴിഞ്ഞു സൂക്ഷിച്ചു വച്ചേക്കു ഞാൻ പീന്നീട് എടുത്തോളാം .അവൻ എന്നെ വീണ്ടും ഞെട്ടിച്ചു കൊണ്ട് പറഞ്ഞു , “വാപ്പച്ചിയെ എനിയ്ക്കു വിശ്വാസമില്ല . കഴിഞ്ഞ പിറന്നാളിന് ഞാൻ വരച്ചു തന്ന പടം പത്രക്കെട്ടിന്റെ ഇടയിൽ ചുരുട്ടിക്കൂട്ടി ഇട്ടിരിയ്ക്കുന്നതു ഞാൻ കണ്ടു “.എന്റെ കൊച്ചാക്കു കൊടുത്തതൊക്കെ ( എന്റെ സഹോദരൻ ) ഷോ കേസ് ഇൽ സൂക്ഷിച്ചു വച്ചിട്ടുണ്ട് . എനിയ്ക്കു കുറച്ചുനേരം ഒന്നും പറയാൻ കഴിയാതായിപ്പോയി .

ഓഫീസിൽ പോകാൻ ഇറങ്ങിയപ്പോൾ ആരും കാണാതെ അവൻ വരച്ച പടം മടക്കിയെടുത്തു കൊണ്ട് വന്നു , ഫ്രെയിം ചെയ്തു വൈകുന്നേരം നന്നായി പൊതിഞ്ഞു അവന്റെ കയ്യിൽ കൊണ്ട് കൊടുത്തു . പൊതിയഴിച്ച അവന്റെ മുഖത്തെ സന്തോഷം ,അതുകണ്ട എന്റെ സന്തോഷം ,ഇതൊക്കെ കണ്ടു നിന്ന എന്റെ ശ്രീമതിയുടെ സന്തോഷം !!! മൊത്തത്തിൽ സീൻ കളർ ആയി .

അപ്പൊ അവന്റെ ഒരു മറുപടികൂടി വന്നു “ ശോ കുറച്ചുകുടെ മഞ്ഞ കളർ അടിയ്ക്കാമായിരുന്നു “

അങ്ങനെ മൊത്തത്തിൽ പിറന്നാൾ കളർ ആയി 🤪🤪🤪🤪

“ദി ഗ്രേറ്റ് ഗ്രാൻഡ്‌ഫാദർ “

എല്ലാപേർക്കും സ്വന്തം അച്ഛനമ്മമാരേക്കാളും അവരവരുടെ അപ്പൂപ്പനമ്മുമ്മ മാരെയാകും കൂടുതൽ സ്നേഹം . റിസെർച് നടത്തിയപ്പോൾ അതിനു പ്രധാന കാരണം ജനിച്ചുവീഴുന്ന അന്നുമുതൽ ഇന്നുവരെ അച്ഛനമ്മമാരുടെ കയ്യിൽ നിന്ന് കിട്ടുന്ന അടിയെ തടുത്തു നിർത്തുന്നത് ഇവരാണ് . അതുകൊണ്ടൊരു പ്രത്യേക മമതയും വാത്സല്യവുമൊക്കെ ഇത്തരക്കാരോട് കൂടുതലാണ് . നമുക്ക് വേണ്ടി വാദിയ്ക്കുക ,ചെറിയ ചില്ലറ പോക്കറ്റ് മണിയൊക്കെ തരിക, നമ്മുടെ ആഗ്രഹങ്ങൾ സാധിയ്ച്ചുതരാനായി പരിശ്രമിയ്ക്കുക ഇത്രയും പോരെ നമ്മളുടെ ഫാൻ ആയി മാറാൻ .സത്യം പറഞ്ഞാൽ ഞാൻ തന്നെ ആലോചിച്ചിട്ടുണ്ട് , എങ്ങനെയാണെന്നറിയില്ല എന്റെ ഉമ്മയെയും,വാപ്പയെയും എന്റെ പുത്രന് വലിയ കാര്യമാ.

അങ്ങനെ ഞങ്ങളുടെ വീട്ടിലും ഇതുപോലൊരു ഫാൻ ഉണ്ടായിരുന്നു,എന്റെ ഉമ്മയുടെ വാപ്പ ഞങ്ങളുടെ ‘കോടാലി അപ്പുപ്പ ‘ .വീട്ടിലെന്നല്ല കുടുംബത്തെതന്നെ വലിയൊരു ഫാൻ . ചെറുമക്കൾക്കൊക്കെ വലിയ ഇഷ്ട്ടമുള്ള , പെണ്മക്കളുടെ കെട്ടിയോന്മാർക്കുവരെ സ്നേഹമുള്ള ഞങ്ങളുടെ അപ്പുപ്പ .നാട്ടിൽ പുള്ളിക്കാരൻ ‘കോടാലി’ എന്ന അപരനാമത്തിലാണ് അറിയപ്പെട്ടതെങ്കിലും കുടുംബത്തു ‘മൂർച്ഛയില്ലാത്ത’ പാവം കോടാലി ആയിരുന്നു .

കരുണാകര ഭക്തനായ അപ്പൂപ്പ, എന്തിനെങ്കിലും വേണ്ടി ഒച്ചപ്പാടുണ്ടാക്കിയിട്ടുണ്ടെങ്കിൽ അത് ‘കരുണാകരൻ’ എന്ന വ്യക്തിയ്ക്കുവേണ്ടിയാകും . പണ്ട് പഞ്ചായത്തു സ്റ്റേഡിയത്തിന്റെ അടുത്ത് സൊറയൊക്കെ പറഞ്ഞിരിയ്ക്കുമ്പോൾ രാഷ്ട്രീയംപറഞ്ഞു ചെറിയ കശപിശയായി , ചെറിയ ഉന്തും തള്ളുമൊക്കെ നടന്നു . തള്ളിന്റെ ശക്തി അൽപ്പം കൂടിയപ്പോൾ അപ്പൂപ്പ ചെറുതായി വന്നൊന്നു വീണു .

വൈകുന്നേരം കളിയ്ക്കാൻ വന്ന എന്റെ ഒരു അനിയൻ(കസിൻ),അവന്റെ കൂട്ടുകാർ പറഞ്ഞു ഈ സംഭവം അറിഞ്ഞു . വിടുമോ അവൻ ,ഒരു കൂട്ടുകാരന്റെ സ്കൂട്ടറും എടുത്തു നേരെ അപ്പുപ്പയുടെ വീട്ടിൽ പോയി

“ കയറപ്പുപ്പ സ്കൂട്ടറിൽ “

വലിഞ്ഞിഴഞ്ഞു അപ്പുപ്പ ബൈക്കിൽ കയറി . നേരെ പിടിച്ചു തള്ളിയ ആളിന്റെ വീട്ടിലേയ്ക്കു . ആശാൻ വീടിന്റെ മുറ്റത്തിരിപ്പുണ്ട് ,

“ഇറങ്ങപൂപ്പ “

അപ്പുപ്പ ഇറങ്ങി , ദയനീയമായി തള്ളിയിട്ട ആളിനെ നോക്കി .

അനിയന്റെ ഡയലോഗ്

“ നിങ്ങൾക്ക് എന്റെ വാപ്പയുടെ പ്രായം ആയിപ്പോയി . അതുകൊണ്ടു ഞാൻ കൈ വെക്കുന്നില്ല “

എന്നിട്ടു തിരിഞ്ഞു അപ്പൂപ്പയെ നോക്കിയിട്ടു ,

” അടി അപ്പുപ്പ അയാളെ “

അപ്പുപ്പ പ്രതിസന്ധിയിലായി , അപ്പുപ്പ അടിച്ചില്ലേൽ ചെറുമോൻ അടിയ്ക്കും , പിന്നെ നൈസ് ആയി ചെറിയൊരുതട്ടും കൊടുത്തു , അവന്റെ വക വാർണിംഗും കൊടുത്തു മടങ്ങി . അന്നവനു പ്രായം പതിനെട്ടാകും .

അപ്പുപ്പ എപ്പോൾ വീട്ടിൽ വന്നാലും ഒരു രൂപ ,രണ്ടു രൂപ ഒക്കെ തരുമായിരുന്നു . ഞങ്ങൾ ചെറുതായിരുന്നപ്പോൾ അപ്പുപ്പ ഞങ്ങളെ തൊട്ടടുത്തുള്ള വേങ്കമല ദേവീക്ഷേത്രത്തിലെ ഉത്സവം കാണിയ്ക്കാൻ കൂട്ടിക്കൊണ്ടു പോയി. അമ്പലത്തിന്റെ ആർച് കടന്നു മൂന്ന് കട കഴിഞ്ഞപ്പോഴേ ഞങ്ങൾ അപ്പുപ്പയുടെ പോക്കറ്റ് കാലിയാക്കി . കണ്ടതും കടിയതുമൊക്കെ പിണങ്ങി വാങ്ങിച്ചു കഴിച്ചും , ബലൂണും ,പീപ്പിയും ,പ്ലാസ്റ്റിക് കാറുമൊക്കെ വാങ്ങിയും അപ്പുപ്പ പാപ്പരായി . ഒടുവിൽ ഞങ്ങളെ തിരികെ വീട്ടിൽ കൊണ്ട് വന്നിട്ട് പറഞ്ഞു

“ നിന്നെയൊക്കെ എങ്ങനെയും വളർത്താം , നിന്റെ പിള്ളേരെ മേലാൽ ഇനി ഞാൻ ഒരിടത്തും കൊണ്ടിറങ്ങില്ല “.

പിന്നെയും ഒത്തിരിവട്ടം കൊണ്ടുപോയിട്ടുണ്ട്

അപ്പുപ്പയും ഉമ്മാമ്മയും പണ്ടുമുതലേ ഒരുമിച്ചു വേറെ വീട്ടിലാണ് താമസം , ഇടയ്ക്കു വെക്കേഷൻ ആകുമ്പോൾ ഞങ്ങളെ കൂട്ടിക്കൊണ്ടുപോകും. ഒരിയ്ക്കൽ എന്നെ ഇതുപോലെ വക്കേഷനു കൂട്ടിക്കൊണ്ടുപോയി , രാത്രിയായപ്പോൾ എന്റെ മട്ടും, ഭാവവുമൊക്കെ മാറി എനിയ്ക്കപ്പോൾ വീട്ടിൽ പോകണം .അന്ന് കാറൊന്നും നമ്മുടെ നാട്ടിൽ കാണാനേ ഇല്ലാത്ത സമയം , പിന്നെ രാത്രി ചൂട്ടും കത്തിച്ചു എന്നെയും തോളത്തെടുത്തു അഞ്ചാറു കിലോമീറ്റർ നടന്നു വീട്ടിൽ കൊണ്ടുവന്നാക്കി , വിത്ത് പഴയ ഡയലോഗ്

“ നിന്നെയൊക്കെ എങ്ങനെയും വളർത്താം , നിന്റെ പിള്ളേരെ മേലാൽ ഇനി ഞാൻ ഒരിടത്തും കൊണ്ടിറങ്ങില്ല “.

പത്തുദിവസം മെഡിക്കൽ കോളേജ് ഐ സി യൂ വിൽ കിടക്കുമ്പോൾ പുറത്തു ചെറുമക്കളും മരുമക്കളുമായിരുന്നു എല്ലാത്തിനും ഓടി നടന്നത് . മരണം കവർന്നെങ്കിലും എവിടെയൊക്കെയോ ഞങ്ങൾക്കായി നിറഞ്ഞ ചിരിയോടെ , പരാതികളൊന്നുമില്ലാത്ത മനസുമായി മറഞ്ഞുനിൽക്കുന്നപോലെ തോന്നും .

NB -അങ്ങനെ ഇന്ന് (18/08/2019)അപ്പൂപ്പാ മരിച്ചിട്ടു അഞ്ചുവർഷമാകുന്നു. അപ്പൂപ്പയുടെ നാലുമക്കളും, അവരുടെ മക്കളും,ചെറുമക്കളും,മരുമക്കളുമൊക്കെയായി നമ്മളൊന്ന് ചെറുതായി കൂടി .

ഒരു എമണ്ടൻ ‘കോടാലി’ കുടുംബസംഗമം 💪💪

ഫെയ്‌സ് ആപ്

അതിരാവിലെ പതിവുപോലെ കണ്ണ് മിനുമിനാ തുറക്കാനായി ശ്രമിയ്ക്കുന്നതോടൊപ്പം ബെഡിന്റെ സൈഡിൽ പരതി സ്വന്തം മൊബൈൽ കണ്ടെടുത്തു . ഗബ്ബർസിംഗിനെ അനുസ്മരിച്ചുകൊണ്ട് ഒറ്റക്കണ്ണ് മാത്രം തുറന്നുപിടിച്ചു ,ആര് എന്തൊക്കെ അയച്ചിട്ടുണ്ട് എന്ന് ആപ്ലികേഷനായ ആപ്ലിക്കേഷൻ എല്ലാം കയറിയിറങ്ങി നോക്കി, എല്ലാത്തിനും മറുപടിയും കൊടുത്തിട്ടു സമാധാനമായി കൈകാലുകൾ നിവർത്തി ശ്വാസം വലിച്ചുവിട്ടു പതിയെ എഴുന്നേറ്റു ഭീകരമായ മുഖം കണ്ണാടിയിൽ നോക്കി , ഭയാനകതയുടെ അവസാനവാക്കിനെ ‘ഫേസ് വാഷ്’ ഇട്ടു കഴുകി വെളുപ്പിയ്ക്കാനുള്ള പാഴ്ശ്രമം , ശ്വാസോഛ്വാസത്തിനിടയിലെവിടെയോ ശക്തമായ ദുർഗന്ധം പല്ലുതേയ്ക്കാൻ പ്രേരിപ്പിച്ചു ! എല്ലാം കഴിഞ്ഞു നേരെവന്നു സെറ്റിയിലിരുന്നിട്ടു ഒരു ‘റക്കാത്’ പത്രം വായിച്ചു , വീണ്ടും മൊബൈൽ എടുത്തു .

അപ്പോഴതാ വാട്സ് ആപ്പ് സ്റ്റാറ്റസിൽ എന്റെ ശ്രീമതിയുടെ കസിൻ, നല്ല ഷേപ്പ് ഒക്കെ ചെയ്തു സുന്ദരമായി താടിരോമം നീട്ടിവളർത്തിയിരിയ്ക്കുന്നു . എനിയ്ക്കാണെങ്കിൽ താടിരോമവും , കട്ടിയുള്ള മീശയുമൊക്കെ വളരുന്ന ആണുങ്ങളെ കാണുന്നതേ വെറുപ്പാണ് 😌😌( കിട്ടാത്ത മുന്തിരി ,അതുതന്നെയാ കാര്യം ) .

ഫാനിന്റെ സ്പീഡ് കൂട്ടിയാൽ പറന്നുപോകുന്ന അത്ര രോമമെ മുഖത്തുള്ളു . ഇതുകണ്ട് കരടിനെയ്യൊന്നു പരീക്ഷിച്ചു നോക്കെന്നു ആരും പറയരുത് , അതൊക്കെ കഴിഞ്ഞു ,എന്ന് മാത്രമല്ല പൂർണ പരാജയം കൂടി ആയിരുന്നു എന്നത് വാസ്തവം .അപ്പോപ്പിന്നെ ഇന്നലെവരെ ഇവിടെ മൂക്കുമൊലിപ്പിച്ചു നടന്ന ചെക്കൻ ,ഇന്ന് ഡെന്റൽ കോളേജിലെ രണ്ടാം വർഷമായപ്പോൾ വന്ന മാറ്റത്തിനെ ഞാൻ പുച്ഛിയ്ക്കുന്നതിൽ തെറ്റുണ്ടോ ? അങ്ങനെ അവനെ പുച്ഛിയ്ക്കാനായി അവന്റെ സ്റ്റാറ്റസിൽ ഒരു കമന്റ് തൊടുത്തുവിട്ടു,

“ എന്താ മോനെ ഒരു വിരഹകാമുകൻ ലുക്ക് ?”

മറുപടി വരാൻ ഒരൽപം വൈകിയെങ്കിലും , വ്യക്തമായിത്തന്നെ ആശാൻ അത് വിവരിച്ചു .

“ഇക്ക ,ഇത് ഫേസ് ആപ്പ് എന്നൊരു അപ്ലിക്കേഷൻ ആണ് . ഞാൻ ഒരു ഫോട്ടോ കൂടി അയയ്ക്കാം നോക്കിക്കോ എന്ന് “

നോക്കിയപ്പോഴല്ലേ രസം അവന്റെ അറുപത്തഞ്ചാമത്തെ വയസ്സിൽ ഉള്ള ഒരു ഫോട്ടോ , ഒരു കൂൾ സുന്ദരൻ അപ്പുപ്പൻ . സത്യത്തിൽ ഞാൻ നൈസ് ആയി ഒന്ന് പാളി , കാരണം ഒരു രാത്രി ഇരുട്ടി വെളുത്തപ്പോൾ വന്ന ശാസ്ത്രത്തിന്റെ പുരോഗതി ഞാൻ അറിയാതെപോയി ,ഒപ്പം , ചിന്ന പൈലിന്റെ പുച്ഛത്തിനു പാത്രമായി .രാവിലെ മനുഷ്യന്റെ നല്ലമൂട് പോയി .

ഏകദേശംഉച്ച ,ഉച്ചര ,ഉച്ചേമുക്കാലായിക്കാണും എന്റെ ഏകദേശം എല്ലാ ലെവെലിലുമുള്ള കൂട്ടുകാരും നാട്ടുകാരും വയസായെക്കുന്നു ! ശെടാ ! എവിടെത്തിരിഞ്ഞു നോക്കിയാലും നരയും , ചുക്കിച്ചുളിഞ്ഞ മുഖവും , മൊത്തത്തിൽ നെഗറ്റീവ് ! ഒരു ദിവസം കൊണ്ട് കഴിയുന്നിടത്തോളംപേർ അങ്ങ് സുന്ദരന്മാരായ വയസ്സന്മാരും , വയസ്സത്തിമാരുമായി . എന്തിനേറെ , ക്രിക്കറ്റ് കളിയ്ക്കാർ മുതൽ നിലത്തു വീണു കിടക്കുന്ന ഫ്രൂട്സ് വരെ വയസായി . ചില നല്ല അപ്പുപ്പന്മാരുടെ ഫോട്ടോ ഇട്ടിട്ടു കുലച്ചു നിൽക്കുന്ന പതിനെട്ടാംവട്ട തെങ്ങ് .

ഏകദേശം അടുത്ത ദിവസമായപ്പോൾ ഒപ്പമുള്ളതിൽ ആരുംതന്നെ എന്റെ അതേപ്രായത്തിലില്ല എന്ന അവസ്ഥയായി .

ഒരു മൂന്നു രോമം ഒരുമിച്ചു വരാത്തതിനെ തളർന്നുപോകുന്ന ഞാൻ ഈ കോപ്രായത്തിനു തലവയ്ക്കുമെന്നു തോന്നുന്നുണ്ടോ ? എവിടുന്നു ഞാനും ശ്രീമതിയും ഫേസ് ആപ്പിനെ പുച്ഛിച്ചു തള്ളി , പോരാത്തതിന് നാല് അപവാദവും ഞാൻ പറഞ്ഞുപരത്തി .

“ ഈ ആപ് ഒക്കെ ഉപയോഗിച്ചാൽ അവന്മാര് ‘ഫേസ് ഐഡി’ഒക്കെ കൊണ്ടുപോകും ,സെക്യൂർ അല്ല . ഇപ്പൊ ബാങ്കിങ് പോലും ഫേസ് ഐഡി ഇട്ടൊക്കെയാ ചെയ്യുന്നേ ! കാശുപോകുന്ന വഴിയറിയില്ല “

ഇത് പറഞ്ഞു എല്ലില്ലാത്ത ആ സാധനം മടക്കി ചുരുട്ടി വായിലേയ്ക്കിട്ടതും മൊബൈലിൽ ഒരു മെസ്സേജ് വന്നു

‘ നിങ്ങളുടെ അക്കൗണ്ടിൽ 19 രൂപ ബാലൻസ് ഉള്ളു , ഉടൻ മിനിമം ബാലൻസ് മൈന്റൈൻ ചെയ്തില്ലെങ്കിൽ എന്നെ ചെത്തിക്കളയും , ചീകിക്കളയും , എന്നൊക്കെപറഞ്ഞു ബാങ്കിന്റെ ഒരു ഭീഷണി . ‘

ഞാൻ തന്നെ അറിയാതെ വിചാരിച്ചു പോയി, “ ഈ പത്തൊൻപതു രൂപയ്ക്കുവേണ്ടിയാണല്ലോ ദൈവമേ , പാവം ഫേസ് ആപ്പിനെ കുറ്റപ്പെടുത്തിയത് “ ദാരിദ്ര്യം ! ദാരിദ്ര്യം !

അങ്ങനെ രണ്ടുദിവസം എവിടെ തിരിഞ്ഞാലും എന്റെ ബ്ലോഗുപോലെ ഒരേ വെറുപ്പിയ്ക്കൽ മയം .

അടുത്ത ദിവസം അറിയുന്നു ഇന്ത്യയിൽ ഫേസ് ആപ്പ് നിരോധിയ്ക്കാൻ പോകുന്നു. കുറേപേർ ചിരിച്ചു , കുറേപേർ കരഞ്ഞു , കുറച്ചുപേർ ഒന്നും മിണ്ടാതെ നടന്നു എന്നാൽ മറ്റുചിലരാകട്ടെ ഇപ്പോഴത്തെ അവസ്ഥയെ ട്രോളി തള്ളുന്നു . ട്രോളുകളുടെ ബഹളം . വാട്സാപ്പ് ഗ്രൂപുകളിൽ ട്രോളുകളുടെ ചാകര . അങ്ങനെ ട്രോളൊക്കെ വായിച്ചു രസിച്ചിരിയ്ക്കിമ്പോഴുണ്ട് പരിചയമുള്ള ഒരു മുഖം ട്രോളിൽ .കണ്ടതോ എന്റെ പത്താം ക്ലാസ് ബാച്ചിന്റെ വാട്സ് ആപ്പ് ഗ്രൂപ്പിൽ , ഞാൻ സത്യത്തിൽ ഞെട്ടിപ്പോയി ഒപ്പം ചിരിയും വന്നു . കഴിഞ്ഞ കുറച്ചു ദിവസത്തെ അവസ്ഥയെപ്പറ്റിയൊരു ട്രോൾ ആണ് . പക്ഷെ അതിൽ ട്രോളാൻ ഉപയോഗിച്ചത് എന്റെ പുത്രന്റെ കുഞ്ഞുന്നാളിലെ ഒരു ഫോട്ടോ .

ഇതേ ഫോട്ടോയിൽ ഇതിനു മുൻപും ആരോ പണിഞ്ഞിട്ടുണ്ടായിരുന്നു , സത്യത്തിൽ അതുകണ്ടപ്പോൾ സന്തോഷത്തിനൊപ്പം ഒരു ഓർമ്മപ്പെടുത്തൽ കൂടിയാണ് എനിയ്ക്കുണ്ടായത് . മുലകുടി മാറാത്ത പ്രായത്തിലെ അവന്റെ ഫോട്ടോ ആയതിനാൽ ഞങ്ങൾ അതിനു വലിയ വിലകൊടുത്തില്ല .

പക്ഷെ ഞാനുൾപ്പെടുന്ന എത്രയോപേർ അവരവരുടെ മുഖം സുന്ദരമാക്കി പല ആപ്ലിക്കേഷനിലും തട്ടിക്കയറ്റുന്നു , നമ്മുടെ ആരുടേയും ഒരു പെർമിഷനും ഇല്ലാതെ,ഒരുപരിചയവും ഇല്ലാത്തവർ അതെടുത്തു എന്തെല്ലാം ചെയ്യുന്നു. !

എല്ലാം കണ്ടാൽ വിശ്വസിയ്ക്കുന്ന നമ്മൾ , സ്വയം എവിടെയെങ്കിലും കാണപ്പെട്ടാലും ഞെട്ടരുത് , നമ്മളുടെ ചെറിയ ഒരു വലിയ അശ്രദ്ധയാണ് ആ കാണുന്നതെന്ന് കരുതി,സമാധാനിയ്ക്കാനേ അന്ന് കഴിയു .

NB- എന്റെ ചെക്കന്റെ അന്നത്തെ അവസ്ഥയും ഫേസ് ആപ്പ് ഇല്ലാതെ റിയാലിറ്റിയിൽ ഇപ്പോഴത്തെ അവസ്ഥയും ഒപ്പം ചേർക്കുന്നു . കൂട്ടത്തിൽ ഏതോ ഒരു ‘തറവാടി’ ട്രോളൻ ട്രോളിയതും .

പിന്നെ കമന്റ് ഇടുന്നവർ അവനെതിരെ കേസ് കൊടുക്കണം , കണ്ടുപിടിയ്ക്കണം എന്നൊന്നും പറഞ്ഞേക്കല്ലേ !

കാരണം ,ജനിച്ച സമയത്തു എന്റെ പുത്രന്റെ നാള് നോക്കിയിട്ടു എന്റെ സുഹൃത്ത് പറഞ്ഞതിങ്ങനാ

“ നിങ്ങൾ അറിയപ്പെടാൻ പോകുന്നത് ഇവനിലൂടെയാണെന്നു “

ഒരുപാടുപേരെക്കൊണ്ട് തന്തയ്ക്കു വിളിപ്പിയ്ക്കും എന്നാണോ എന്ന് കാത്തിരുന്നുകാണാം 🤪🤪

സാമൂഹിക പ്രതിബദ്ധതയുള്ള എന്തെങ്കിലുമൊക്കെ എഴുതണമെന്നു ആരൊക്കയോ ഉപദേശിച്ചു ,

എല്ലാപേർക്കും ഇതൊരു പാഠമായിരിയ്ക്കട്ടെ 🤪🤪🤪🤪

സാൾട് മാംഗോ ട്രീ

വളരെ സിമ്പിൾ ആയി എന്നാൽ , അതിലേറെ സ്വാദോടെ ശ്രീമതി അടുക്കള ഉപരോധിയ്ക്കുമ്പോൾ എങ്ങനെ ഉപ്പുമാവ് ഉണ്ടാക്കാം ?

ചേരുവകകൾ –

1 .പകുതി മുറിച്ച സവാള ( പകുതി ക്ലീൻ ചെയ്തത് റെഫ്രിജറേറ്ററിൽ ഉണ്ടായിരുന്നു )

2 . തക്കാളി ഒരെണ്ണം ( വളരെ ചെറുതായി അരിഞ്ഞത് )

3. പച്ചമുളക് ( ചെറുത് ഒരെണ്ണം )

4. ഇഞ്ചി ( ചെറുതായി അരിഞ്ഞത് അഹങ്കാരത്തിനു )

5 . കടുക് ( എണ്ണംപറയാൻ കഴിയാത്തത്ര )

6 . കറിവേപ്പില ( 7 എണ്ണം )

7. വെളിച്ചെണ്ണ ( പാകത്തിന് )

8 . നെയ്യ് ( പാകത്തിന് )

9. പഞ്ചസാര ( ആവശ്യത്തിന് )

10. ഉപ്പു ( ആവശ്യത്തിന് )

11 . പാൽ ( ഒരു ഗ്ലാസ് )

12 . വറ്റൽ മുളക് ( ഒരെണ്ണം )

13 . റവ ( ആളിനനുസരിച്ച്)

ഇതിൽ കഴുകി വൃത്തിയാകാൻ കഴിയുന്നതൊക്കെ നല്ല മനസുവച്ചു കഴുകി വൃത്തിയാക്കുക .

അതിനുശേഷം പച്ചക്കറികളെല്ലാം കുനുകുനെ, കുനുകുനെ അരിഞ്ഞു ചെറുതാക്കുക . ശേഷം കുക്കർ അടുപ്പിൽ വച്ച് തീകത്തിക്കുക , കുക്കർ ചൂടായാൽ അതിലേയ്ക്ക് അൽപ്പം വെളിച്ചെണ്ണ ഒഴിയ്ക്കുക , നല്ല ഒരു

ഷീ! ഷീ! ഷീ! സൗണ്ട് കേൾക്കും ,

അപ്പോൾ ശ്രീമതി എടുത്തുചാടിവരും , (കിച്ചണിൽ തീപിടിച്ചെന്നു കരുതിയാകും ആ വരവ് ). പക്ഷെ നമ്മൾ കുലുങ്ങാൻ പാടില്ല .നന്നായി കൊക്കിക്കുരച്ചു നമ്മുടെ കഷ്ടപ്പാടും ബുദ്ധിമുട്ടും അറിയിക്കുക . താനേ തിരികെ പൊയ്ക്കോളും .

അതെ ദേഷ്യത്തിൽ , ഹോമകുണ്ഡത്തിലേയ്ക്ക് നെയ്യൊഴിയ്ക്കുമ്പോലെ കടുകെടുത്തു അൽപ്പം ചൂടായ എണ്ണയിലേക്കെറിയുക .കടുക് പൊട്ടാൻ തുടങ്ങുന്നതിനു മുൻപേതന്നെ , കടുകിന്റെ തലമണ്ടനോക്കി അഞ്ചുകറിവേപ്പില എടുത്തിടുക , ചൂട് സഹിയ്ക്കാനാകാതെ കറിവേപ്പില ഞെരിപിരി കൊള്ളുകയും, കടുക് മുറുമുറുക്കുകയും ചെയ്യുമ്പോൾ അതിലേയ്ക്ക് വറ്റൽ മുളകിനെ രണ്ടായി കീറിയിടുക .ബാക്കി രണ്ടു പേരും സൈലന്റ് ആയിക്കഴിയുമ്പോൾ കടുക് പൊട്ടാൻ തുടങ്ങും . അപ്പോൾ അതിലേയ്ക്ക് കുറച്ചു നെയ്യൊഴിച്ചു കൊടുക്കുക. ശേഷം സവാള , പച്ചമുളക് ,ഇഞ്ചി എന്നിവ കട്ടിങ്‌ബോഡിൽനിന്ന് കത്തിവച്ചു നീക്കി കൊക്കയിലേക്ക് തള്ളിയിടുന്നപോലെ നരകത്തിലേക്ക് നീക്കിയിടുക .

നല്ല സുന്ദരമായ നെയ്യുടെ മണം മൂക്കിലടിയ്ക്കുമ്പോൾ വീണ്ടും ശ്രീമതി പ്രത്യക്ഷപ്പെടും . ഇത്തവണ ഒരു ചെറിയ ഡയലോഗ് പ്രതീക്ഷിയ്ക്കാം

“ മനുഷ്യ നെയ്യൊക്കെ തീർക്കോ ?”

ഒന്നും ആയിട്ടില്ല എന്ന തിരിച്ചറിവോടെ വീണ്ടും അകത്തേയ്ക്കു .ആ തക്കത്തിന് തക്കാളി ഇടുക .ഷീ ഷീ ഷീ സൗണ്ടിന്റെ കട്ടി കൂടും ഒപ്പം നല്ല പുകവരും , പക്ഷെ ശ്രീമതി പുറത്തേയ്ക്കു വരില്ല . ഇനിയാണ് രസം മോനെ !!

രണ്ടു സ്പൂൺ പഞ്ചസാര , ആവശ്യത്തിന് ഉപ്പും ഇടുക അപ്പോഴേയ്ക്കും തക്കാളി വെന്തു , പഞ്ചസാരയുരുകി ഒരു സെമി ലിക്വിഡ് ആയിട്ടുണ്ടാകും ഒരു രക്ഷയുമില്ലാത്ത മണം മൂക്കിലേയ്ക്കിടിച്ചു കയറും . അപ്പോൾ ഒരു ഗ്ലാസ് പാൽ അതിലേക്കൊഴിയ്ക്കുക . അതിനകത്തു ജാഡകാണിച്ച സകല ടീമും ഒന്ന് ഒതുങ്ങും . പകുതി മൂടി വച്ചശേഷം , അടുത്ത അടുപ്പിൽ ഒരു പാത്രം വച്ച് , കുറച്ചു നെയ്യൊഴിച്ചു റവ കുറച്ചു വരട്ടിയെടുക്കുക . ശേഷം പാല് പതിയെ തിളച്ചുവരുമ്പോൾ അതിലേയ്ക്ക് മൂപ്പിച്ചു വച്ചേക്കുന്ന റവ പതിയെ പതിയെ ഇടുക .

ഇവിടെ തിളച്ചുപൊങ്ങിയ പാലിൽ റവ വീഴുന്നു അവിടെ ഇളകുന്നു , അവിടെ ഇളകുന്നു റവ വീഴുന്നു , മാറി മാറി കാണിയ്ക്കുക . നന്നായി അടിയിൽ പിടിയ്ക്കാതെ ഇളക്കിക്കൊണ്ടേയിരിയ്ക്കുക . കൈ കഴയ്ക്കുമ്പോൾ അടുപ്പു ഓഫ് ചെയ്തു വീണ്ടും ഇളക്കുക . ഇനി നമ്മളെക്കൊണ്ടൊന്നിനും കൊള്ളില്ല എന്ന് സ്വയം തോന്നുമ്പോൾ ഇളക്കുന്നതു നിർത്തുക .

ശ്രീമതി വൃത്തിയായി കഴുകിവച്ചേക്കുന്ന പാത്രം എടുക്കുക . ചിരട്ടപ്പുട്ടുണ്ടാക്കുന്ന കുറ്റിയുണ്ടെങ്കിൽ അതിൽ റെഡി ആക്കി വച്ചിരിയ്ക്കുന്ന ഉപ്പുമാവ് കുത്തികയറ്റുക , എന്നിട്ടു പാത്രത്തിലേക്കു കമിഴ്ത്തിത്തട്ടുക . ഭാഗ്യമുണ്ടെങ്കിൽ പൊട്ടിപ്പൊളിയാതെ ഒരു പ്രത്യേക തരം ഉപ്പുമാവ് ഉണ്ടാകും , നമ്മൾ സ്വയം പരീക്ഷണം നടത്തിയതാണെങ്കിലും ഇത് മൂന്നു പാത്രത്തിൽ സെർവ് ചെയ്യാൻ ഡൈനിങ്ങ് ടേബിളിലേയ്ക്ക് എടുക്കുക .

കമിഴ്ന്നുകിടക്കുന്ന ഉപ്പുമാവിന് കുറച്ചു വിരൂപയാക്കാൻ വേണമെങ്കിൽ ശ്രീമതി കൊളെസ്ട്രോൾ പിടിയ്ക്കും എന്നുപറഞ്ഞു അരിക്കലത്തിൽ താഴ്ത്തിവച്ചേക്കുന്ന ക്യാഷുനട്ട് തപ്പിയെടുത്തു ഒരെണ്ണം ഏറ്റവും മുകളിൽ മലർത്തിക്കിടത്താം . പാത്രത്തിൽ ബാക്കിവന്ന ഒരു കറിവേപ്പിലയെടുത്തു എവറസ്റ്റ്ന്റെ മുകളിൽ പതാക കുത്തിവച്ചേക്കുന്നതുപോലെ കുത്തിനിർത്താം . അതൊക്കെ അവനവന്റെ മനസിന്റെ കടുപ്പംപോലെ .

പ്രത്യേകം ശ്രദ്ധിയ്ക്കേണ്ട കാര്യങ്ങൾ , കട്ട് ചെയ്തു വച്ചേക്കുന്നതിൽ എന്തെങ്കിലും ഇടാൻ മറന്നുപോകുകയോ , ബാക്കിവരുകയോ ചെയ്‌താൽ ശ്രീമതി ഇൻസ്പെക്ഷന് വരുന്നതിനുമുന്നെ വെസ്റ്റ് ബിന്നിൽ ഇടുക , ഒപ്പം ഒരു ചെറിയ മന്ത്രം ഉരുവിടുക

“ ഹോ എല്ലാം കറക്ട് അളവായിരുന്നു ,ഒന്നും ബാക്കിവന്നില്ല “.

പിന്നെ ചെയ്ത പാചകം വായിൽ വയ്ക്കാൻ കൊള്ളില്ലെങ്കിലും , ഒരു ഫോട്ടോ എടുത്ത് വച്ചേയ്ക്കുക , മഞ്ഞപ്പൊടിയൊന്നും ഇട്ടു ഉപ്പുമാവ് നാറ്റിയ്ക്കരുത്, ഫോൺ ക്യാമെറയിൽ ‘വിവിഡ്’എന്നൊരു ഓപ്ഷൻ ഉണ്ട് അതിട്ടാൽ ആവശ്യത്തിന് മഞ്ഞ കളർ കിട്ടും .

ഒരല്പനേരം പാകം ചെയ്ത ഉപ്പുമാവ് അടച്ചുവയ്ക്കുക , ശേഷം ശ്രീമതി ഇരിയ്ക്കുന്ന പരിസരപ്രദേശത്തുകൂടെ താലപ്പൊലിയും കൊണ്ടുപോകുന്നതുപോലെ ഉപ്പുമാവുമായി ചെറിയൊരു ശയനപ്രദക്ഷിണം നടത്തുക , ഒട്ടും മടിയ്ക്കാതെ , തളരാതെ ‘രാമനാഥൻ’ അണ്ണന്റെ പിറകെ ‘ഗംഗച്ചേച്ചി ’ വരുന്നതുപോലെ സ്വന്തം വീടുകളിലെ ‘നാഗവല്ലി’ ഉപ്പുമാവ് കഴിയ്ക്കാൻ സീറ്റ് പിടിച്ചിട്ടുണ്ടാകും . വിജയം സുനിശ്ചിതം .

നല്ല ചൂട് ചെറിയമധുരവും ,ഉപ്പും ,എരിയുമൊക്കെയുള്ള നെയ്യിന്റെയും ,പാലിന്റെയും പ്രസരിപ്പിൽ മുങ്ങിയുയർന്ന നല്ല പൂപോലുള്ള ഉപ്പുമാവ് ഒരു ചെറിയ ഉരുളയുരുട്ടി കഴിച്ചു നോക്കിക്കേ !! ചുമ്മാ ഒരു ടൈറ്റാനിക് ഓടിയ്ക്കാനുള്ള വെള്ളമുണ്ടാകും ,ആവായിലിപ്പോൾ 🤪🤪

നല്ലൊരു ഫോട്ടോ അൽപ്പം തള്ള് , രുചിയൂറുന്ന ഉവ്വുമാവ് റെഡി .

NB- എല്ലാം കഴിച്ചു ,കറിവേപ്പിലപോലും കളയാതെ കടുകുപോലും കീറിമുറിച്ചു പരിശോധിച്ച് കഴിച്ചു കഴിഞ്ഞിട്ട് ശ്രീമതിയുടെ ഒരു നന്ദിപ്രസംഗമുണ്ടാകും, ദാ ഇങ്ങനെ

“ മനുഷ്യാ , എനിയ്ക്കു കിച്ചൻ വലിച്ചുവാരിയിടുന്നതിഷ്ടമല്ല , എല്ലാം കഴിഞ്ഞിട്ട് എന്റെ അടുക്കള പഴയപടിയാക്കിയില്ലെങ്കിലാണ് ,എന്റെ സ്വഭാവം മാറുന്നത് “

‘അങ്ങനെയെങ്കിലും ഈ പീറ സ്വഭാവം ഒന്ന് മാറട്ടെയെന്നുകരുതി , ഞാൻ അടുക്കളയിൽ നിന്ന് മുങ്ങും ‘

ഒരു കശുവണ്ടി ഉണ്ടായിരുന്നത് ഫോട്ടോയ്ക്ക് മുൻപേ ,ആക്രാന്തനം മൂത്തു ഞങ്ങളിൽ ആരോ അത് കഴിച്ചു , നിങ്ങളത് തപ്പേണ്ട 🤪

ഈ താലപ്പൊലിയും പിടിച്ചു നിൽക്കുന്ന ബാലനാണ് ‘നകുലണ്ണൻ ‘, ഈ ഫോട്ടോ എടുത്തത് ,

അമ്പട കേമാ സണ്ണിക്കുട്ടാ 😎

ഒരു മരണമാസ് വീഡിയോ കൊളാഷ്

ശ്രീമതിയുടെ ‘ബർത്ഡേയ്’ ആണ് , ഗിഫ്റ്റിനോടൊന്നും വലിയ താൽപ്പര്യമില്ലാത്ത ടീം ആണ് . അപ്പൊ പിന്നെ എന്തെങ്കിലും കട്ടയ്ക്കു വേണം കളർ ആക്കാൻ . അങ്ങനെ ഓർത്തപ്പോൾ തോന്നിയ ഐഡിയയാണ് നാട്ടുകാരെയും, വീട്ടുകാരെയും ,വേണ്ടപ്പെട്ടവരെയും , കൂടെ പഠിച്ചവരെയും , കൂടെ വർക്ക് ചെയ്തവരെയും കൂട്ടിയൊരു വീഡിയോ കൊളാഷ് .

അങ്ങനെ മൂന്നുദിവസം മുൻപേ ഒരു മെസ്സേജ് സെറ്റ് ചെയ്തു .

“ എന്റെ ശ്രീമതിയുടെ ബർത്ഡേയ് ആണ് , ‘ഹാപ്പി ബർത്ഡേയ് ഷെമി ‘. എന്ന് വിഷ് ചെയ്യുന്ന ഒരു ചെറിയ വീഡിയോ ക്ലിപ്പ് എനിയ്ക്കു പേർസണൽ ആയി അയച്ചുതരണം , പ്ളീസ് “.

ആദ്യ ഒരു മണിയ്ക്കൂറിനു ശേഷം ഭയങ്കര റെസ്പോൺസ് ആയിരുന്നു ! ചറപറാന്നു ഒരു ലോഡ് വീഡിയോ വിഷ് .

“ ദേവിയേയ് ഇവൾക്കിത്രയ്ക്കു ഫാൻസോ “

ഞാൻ ഞെട്ടി .അവളുടെ കുട്ടിമാമ മുതൽ ഇന്നലെപെറ്റുവീണ കൊച്ചു കുട്ടികൾ വരെ വീഡിയോ സെറ്റ് ചെയ്തു തകർത്തുകളഞ്ഞു .

തിരക്കുകളുടെയിടയിൽ കിട്ടിയ സമയം ഉള്ളതുപോലെ കഴിയാവുന്ന ആൾക്കാരെ കൂട്ടി ചെറിയ ചെറിയ വീഡിയോ ക്ലിപ്സ് . ചിലർ ആത്മാർത്ഥമായി അഭിനയിച്ചു തകർത്തു , ചിലർ ആദ്യ ശ്രമം വളരെ ഭംഗിയാക്കി , മറ്റുചിലർ വീഡിയോ ഇടാൻ ചെറിയ നാണം , പക്ഷെ അതിലും ഹൈലൈറ്റ് , അവർ സത്യസന്ധമായി പറഞ്ഞു ,

“വീഡിയോ വലിയപാടാണ് ,മനസുകൊണ്ട് ഒരായിരം വിഷസ് പറഞ്ഞേക്കു ‘എന്ന് . വിടുമോ ഞാൻ ,അതിന്റെയും സ്ക്രീൻ ഷോട്ട് എടുത്തു എഡിറ്റ് ചെയ്തു ചേർത്തു . മറ്റുചിലർ ഓഡിയോ ക്ലിപ്പ് അയച്ചുതന്നു . എന്തായാലും ഒരു രീതിയിലല്ലെങ്കിൽ മറ്റൊരു രീതിയിൽ എല്ലാപേരും തകർത്തു .

“സ്വന്തം മുഖം അത്ര പോരളിയാ “

എന്നും പറഞ്ഞു , എന്റെ ഒരു ഫ്രണ്ട് സൗദിയിൽ നിന്ന് രണ്ടു പെൺപിള്ളേരെ സബ്സ്റ്റിട്യൂട് എടുത്തു അവരെക്കൊണ്ടു മെസ്സേജ് പറയിച് എന്നെ ഞെട്ടിച്ചുകളഞ്ഞു .

ഇതിൽ എന്റെ പുത്രനെയും ഉൾപ്പെടുത്തണമല്ലോ , അവന്റെ ഒരു കുഴപ്പം,വലിയ ‘സർപ്രൈസ് ‘ഒന്നും താങ്ങില്ല . അവൻ ചിലപ്പോ പൊട്ടിയ്ക്കും .

കാരണം അവൻ ഒരു ഗിഫ്റ്റ് ഉണ്ടാക്കി. മുകളിലെ റൂമിൽ ഇരുന്നാണ് ചെയ്തത് , ശ്രീമതികാണാതിരിയ്ക്കാൻ . പക്ഷെ ഇവനെ കാണാതായപ്പോൾ അവൾ

,”എന്താ മുകളിൽ പരിപാടി? “എന്ന് ചോദിച്ചു ,വ്യക്തവും വടിവൊത്തതുമായ ശബ്ദത്തിൽ

” ഒരു സർപ്രൈസ് സെറ്റ് ചെയ്യുകയാണെന്ന് “

പറഞ്ഞു കൊടുത്തു . അതുകൊണ്ടു ഞാൻ ഒന്ന് പേടിച്ചു . അവനു സർപ്രൈസ് ഉള്ളിലൊതുക്കി രാത്രി പന്ത്രണ്ടുവരെ പിടിച്ചുനിൽക്കാനൊന്നും കഴിഞ്ഞില്ല ,അങ്ങനെ ആറാംതീയതി പത്തുമണിയ്ക്കുതന്നെ അവന്റെ ഗിഫ്റ്റ് ശ്രീമതിയ്ക്കുകൊടുത്തു . അവളുടെ ജൂവലറി മേക്കിങ് ന്റെ സാധന സാമഗ്രികൾ വച്ചൊരു ‘ബിനാലെ ഐറ്റം ‘. ഗിഫ്റ്റ് കൊടുത്തശേഷം ഒരു ഡയലോഗ് കൂടി

“ കുറച്ചൂടെ ഐറ്റംസ് ഉമ്മച്ചിയ്ക്ക് വാങ്ങി വച്ചുകൂടെ “. അവൾ പ്ലിങ്

ഇത്രയൊക്കെ അനുഭവം ഉള്ളതിനാൽ അവനോടു

“ ഉമ്മച്ചി കേൾക്കാതെ ഒരു വിഷ് ചെയ്യാൻ പറഞ്ഞു “

സത്യത്തിൽ അവൻ വിഷ് ചെയ്തത് ആരും കേട്ടില്ല . ഒൺലി ആക്ഷൻ ,സൗണ്ട് ഇല്ല .

പാട്ടും ചിരിയും കളിയുമൊക്കെയായി സംഭവം കളർ . സത്യത്തിൽ ഒരു പൂവ് ചോദിച്ച എനിയ്ക്കു നിങ്ങൾ ഒരു പൂക്കാലം തന്നു .ഞാൻ പ്രതീക്ഷിച്ചതിലും ഏറെ . എല്ലാം സെറ്റ് ചെയ്തു കഴിഞ്ഞപ്പോൾ വീഡിയോ എഡിറ്റ് ചെയ്യണം . കഴിഞ്ഞ രണ്ടു ദിവസമായി ആയി ഒരു വീഡിയോ എഡിറ്റിംഗ് സോഫ്റ്റ്‌വെയർ പണിഞ്ഞു പഠിയ്ക്കുകയായിരുന്നു . അതിങ്ങനെ പന്ത്രണ്ടു മണിയ്ക്കുശേഷം ഒന്നരവരെ പഠിച്ചു . അങ്ങനെ പണിഞ്ഞു പണിഞ്ഞു 73 വീഡിയോ ക്ലിപ്സ് വല്ലവിധേനയും സെറ്റ് ചെയ്തു . ഭാഗ്യം കൊണ്ട് 12 മണിയ്ക്ക് പത്തുമിനിറ്റുള്ളപ്പോൾ ശ്രീമതി ഉറക്കമായി . ഞാൻ എല്ലാം സെറ്റ് ചെയ്തു . സൗണ്ട് ഉണ്ടാക്കാതെ താഴെവന്നു .ടീവി ,ലാപ്ടോപ്പ് ഒക്കെ കണക്ട് ചെയ്തു . എല്ലാം സെറ്റ് ആക്കി , അവൾക്കിരുന്നു കാണാൻ ചെയർ വരെ റെഡി .

ഞാൻ ഡോർ തുറന്നു സർപ്രൈസ് വീഡിയോ കാട്ടാൻ കൂടെ വരാനായി പുത്രനെ വിളിച്ചു , എവിടുന്നു ,നല്ല സുന്ദരമായ ഉറക്കം . ഞാൻ ശ്രമം ഉപേക്ഷിച്ചു .നേരെ ശ്രീമതിയെ വിളിച്ചു

“ ഹാപ്പി ബർത്ഡേയ് “ .

ഒരനക്കവും ഇല്ല , ഞാൻ കുലുക്കിവിളിച്ചു , എവിടുന്നു , നോ അനക്കം അറ്റ് ആൾ . വീണ്ടും ശ്രമിച്ചുനോക്കി , ചെറുതായി കണ്ണുതുറന്നു വരുന്നു , അബോധാവസ്ഥയിൽ ,

“ഉറങ്ങീലെ മനുഷ്യ ? “ .

ഞാൻ – “ ഹാപ്പി ബിർത്ഡേയ് “

ശ്രീമതി – “ താങ്ക് ,!!!!!! “ ( ഉറങ്ങി )

NB – കർണൻ, നെപ്പോളിയൻ , ഭഗത്സിങ് അവർക്കൊക്കെ എന്തുമാകാല്ലോ !!!!

“ഇവാളുതെ അക്കരേലു “ ,’അരി’ ,ഇതിനാണ് ഞാൻ ഇക്കഴിഞ്ഞ കുറച്ചുദിവസം എന്റെ ഉറക്കം കളഞ്ഞത് , എന്തായാലും രാവിലെ ഏഴുമണിയ്ക്കു വിളിച്ചുണർത്തി ഞാൻ വീഡിയോ കൊളാഷ് കാണിച്ചുകൊടുത്തു . അപ്പോൾ അന്തംവിട്ടു ,കുന്തം വിഴുങ്ങിയിരുന്നു ആസ്വദിച്ചു,സന്തോഷിച്ചു, ചിരിച്ചു , ചിലരെയൊക്കെ കണ്ടു കണ്ണുനിറഞ്ഞു കണ്ടുതീർത്തിട്ടു ചോദിയ്ക്കുകയാ ,

“ഇക്ക ഇന്നലെ നൈറ്റ് വിളിച്ചുണർത്തി ഇത് സർപ്രൈസ് ആയി കാണിച്ചുകൂടായിരുന്നോന്നു “ ,

ഒരു രണ്ടുമിനുട്ടുകഴിഞ്ഞപ്പോൾ ദാ വരുന്നു ശ്രീമതി ,സ്റ്റാൻഡ് വിട്ടുപുറത്തേക്കിറങ്ങുന്ന സൂപ്പർ ഫാസ്റ്റ് ബസ് പോലെ ,

” മനുഷ്യ ഈ നാട്ടുകാരുമുഴുവൻ എന്റെ വയസ്സ് അറിഞ്ഞുകാണുമല്ലോ? നിങ്ങൾക്ക് വയസ്സാം കാലത്തിതെന്തിന്റെ കേടാ ?”🤪

കിളിപോയ ഞാൻ ,ഡബിൾ “പ്ലിങ് “

ഇന്നിപ്പോൾ ഈ പോസ്റ്റ് ഇവിടെ തിരുകികയറ്റാൻ കാരണം , ഇന്നലെ ഇതുപോലൊരു അഭിനയം കാഴചവച്ചതേയുള്ളു ! ഏഴെട്ടു ടേക്ക് എടുത്തിട്ടാണ് ഒന്ന് ശെരിയായതു . അവിടെ ഇനി എന്തായോ എന്തോ ?

‘വിഷ്ണു’ ഒരായിരം ജന്മദിനാശംസകൾ .

നിങ്ങളെല്ലാപേരും കൂടി അന്ന്കളർ ആക്കിയ ആ വീഡിയോ കൊളാഷിനേക്കാളും സൂപ്പർ ഒരെണ്ണം അണിയറയിൽ റെഡി ആക്കിയ താങ്കളുടെ ശ്രീമതിയ്ക്കും അഭിനന്ദനങ്ങൾ.

(വിഷ്ണു ,ഇന്നൊരു ,ഒന്നൊന്നര സെന്റിമെൻസ് വാരിവിതറാനുള്ള ചാൻസ് കാണുന്നു )

“പടച്ചോനെ ഇങ്ങള് കാത്തോളീൻ “

Treat വാങ്ങാൻ എവിടാ വരേണ്ടതെന്നുകൂടി അറിയിയ്ക്കണേ🤪!

നിങ്ങളുടെ അനുവാദത്തോടെ ഇതിവിടെ കിടക്കട്ടെ .

ഒരു ലിഫ്റ്റ് തരുമോ പ്ളീസ്

ജീവിതത്തിൽ ഒരാൾക്കെങ്കിലും ലിഫ്റ്റ് കൊടുക്കാത്ത ഒരു ബൈക്ക് റൈഡറും ഉണ്ടാകില്ല , കാർ ഡ്രൈവേഴ്‌സും ഉണ്ടാകില്ല . ഒന്ന് രണ്ടു വർഷത്തിന് മുൻപ് ഞാൻ പുത്രനെ സ്കൂളിൽ നിന്ന് പിക്ക് ചെയ്തു വരുന്നവഴി കാർ ആക്കുളം ബൈപാസ് ഭാഗത്തെ ഞങ്ങളുടെ ഫ്ലാറ്റിലേക്ക് പോകാനായി തിരിഞ്ഞതും എന്റെ സൈഡ് ഗ്ലാസ്സിലൂടെ കുറച്ചു കുട്ടികൾ അതുവഴി ഉള്ളൂർ ഭാഗത്തേയ്ക്ക് പോകുന്ന കാറിനു ലിഫ്റ്റ് ചോദിയ്ക്കുന്നതും , കാർ നിർത്താതെ പോകുന്നതും കണ്ടു . അവർ പരസ്പരം സംസാരിയ്ക്കുന്നതും , നഷ്ട്ടമായ ലിഫ്റ്റിൽ ഒരൽപ്പംപോലും വിഷമിയ്ക്കാതെ അടുത്ത ഊഴത്തിനായി കാത്തുനിൽക്കുന്നതും ഒരു വളവു നിവരുന്നതുവരെ ഞാൻ എന്റെ സൈഡ് ഗ്ലാസ്സിലൂടെ കണ്ടു .

ഞാൻ പുത്രനോട് ചോദിച്ചു

“ ടാ നമുക്ക് കാർ ഒന്നുതിരിച്ചാലോ ?”

പുത്രൻ “എന്തിനാ വാപ്പച്ചി? “

ഞാൻ – “കുറച്ചു ചേട്ടന്മാരും ചേച്ചിമാരും അവിടെ നിൽപ്പുണ്ട് , അവർക്കു ഒരു ലിഫ്റ്റ് കൊടുത്താലോ? “

അവനു സന്തോഷമായി .

“ അടിപൊളി ,വാപ്പച്ചി “.

ഞാൻ കാർ പതിയെ തിരിച്ചു . അവരുടെ അടുത്തേയ്ക്കു എത്തുമ്പോഴേയ്ക്കും , ലിഫ്റ്റ് ചോദിയ്ക്കാനായി അവരുടെ കൈ നീണ്ടിരുന്നു . ഞാൻ ഇൻഡിക്കേറ്റർ ഇട്ടു കാർ അവരുടെ സൈഡിലേക്ക് നിർത്തി . സന്തോഷത്തോടെ കുറച്ചുപേർ ഓടിവന്നു . ആൺകുട്ടികളും പെൺകുട്ടികളും കഴിയുന്നിടത്തോളം അവർ കാറിൽ കയറി .

ബാക്കിയുള്ളവർ പുഞ്ചിരിയോടെ അടുത്ത വാഹനം കാത്തുനിന്നു .

ഞാൻ – “എല്ലാപേരും ഓക്കെ അല്ലെ “

എന്ന് ചോദിച്ചു വണ്ടി മുന്നോട്ടേയ്ക്കെടുത്തു . ഞങ്ങളുടെ ടെലിവിഷൻ കൂടിയായ ബിഗ് എഫ്.എം ഇൽ കിടിലം ഫിറോസും സ്വീറ്റ് അൻസിയും കത്തിക്കയറുന്നു , ഞാൻ അറിയാതെ വോളിയം കുറച്ചുവച്ചു . വളരെ നിശബ്ദത . അവർ എന്റെ പുത്രനോട് എന്തൊക്കെയോ ചോദിയ്ക്കുന്നുണ്ട് . ഞാൻ അവനുവേണ്ടി മറുപടി പറഞ്ഞുകൊണ്ടിരുന്നു. അവർ പരസ്പരം സംസാരിയ്ക്കുന്നുണ്ട്. പലതും എനിയ്ക്കു മനസിലാകുന്നില്ല .എന്റെ പുത്രൻ വായും പൊളിച്ചിരുന്നു.

അവർ ഉള്ളൂർ എത്തിയപ്പോൾ ഇവിടെ ഇറങ്ങണം എന്ന് പറയുകയും അവരുടെ എല്ലാപേരുടെയും സ്പെഷ്യൽ നന്ദി അറിയിക്കുകയും ചെയ്തു . ഞങ്ങൾ രണ്ടുപേരും സന്തോഷത്തോടെ വന്നവഴി തിരികെ ഫ്ലാറ്റിലേക്ക് പോയി .ഞാൻ കാർ തിരിയ്ക്കുന്നതും , തിരികെ പോകുന്നതും അവർ നോക്കിനിൽക്കുന്നതും പരസ്പരം എന്തൊക്കെയോ പറയുന്നതും ഞാനെന്റെ ഗ്ലാസ്സിലൂടെ നോക്കി ഫ്ലാറ്റിലേക്ക് മടങ്ങി . ഒരു നല്ല കാര്യം ചെയ്ത ചാരിതാർഥ്യത്തോടെ.

ഞങ്ങൾ വീട്ടിൽ വന്ന് ശ്രീമതിയോടു കാര്യം അവതരിപ്പിച്ചപ്പോൾ ,അവൾക്കും സന്തോഷമായി .

അങ്ങനെ ഞങ്ങൾ ഒന്നുരണ്ടു ദിവസം ഇത് ആവർത്തിച്ചു , എനിയ്ക്കു പോകേണ്ട വഴിയല്ലെങ്കിലും ഞങ്ങൾ അവരെ പിക്ക് ചെയ്തു ഡ്രോപ്പ് ചെയ്തു .ഒരുദിവസം അവർ മടിയോടെ പറഞ്ഞു വേണ്ട ഞങ്ങൾ വേറെ കാറിൽ പൊയ്ക്കൊള്ളാം എന്ന് .മടിയോടെ അവർ വീണ്ടും കയറി . പിന്നെ മകന്റെ യാത്ര സ്കൂൾ ബസിലായി,ഞാൻ അവരെ കാണാതായി .

രണ്ടുവർഷത്തിനിപ്പുറം ,ഇന്ന് ഞാൻ ഒറ്റയ്ക്ക് നല്ല വിശപ്പിന്റെ കാഠിന്യത്തിൽ വീട്ടിലേയ്ക്കു കുറുക്കുവഴികളിലൂടെ പോകാം എന്നുകരുതി ആക്കുളം ഭാഗത്തുനിന്ന് തിരിഞ്ഞു വരുമ്പോൾ , വീണ്ടും ഒരു ചെറിയ ആൾക്കൂട്ടം മൊത്തത്തിൽ എനിയ്ക്കു കൈ കാണിച്ചു . ഞാൻ കാർ നിർത്തി നോക്കുമ്പോൾ പഴയ സ്ഥിരം ആൾക്കാരും മൂന്ന് പുതിയ കുട്ടികളും . ഞാൻ പുറകിലെ സീറ്റിൽ നോക്കിയപ്പോൾ എന്റെ ലാപ്ടോപ്പ് , കുറെ ബിൽസ് ഒക്കെ ഇട്ടുവച്ച ഒരു ബാഗ്.ഞാൻ കാർ തുറന്നിറങ്ങി എല്ലാം ബൂട്ടിലേയ്ക്ക് ഷിഫ്റ്റ് ചെയ്തു .

അവർ സന്തോഷത്തോടെ കാറിലേയ്ക്ക് കയറി . സ്ഥലപരിമിതി കാരണം ഒരാൾ ഒറ്റയ്ക്ക് പുറത്തു നിൽക്കുന്നു . സുഹൃത്തുക്കളെയെല്ലാം ആ കാറിലേക്ക് സന്തോഷത്തോടെ കയറ്റിയിട്ടു ആ ‘മോൻ’ പൂർണ തൃപ്തിയോടെ അടുത്ത വാഹനവും കാത്തു മാറിനിന്നു . ഞാൻ നിർബന്ധിച്ചു അതെ കാറിൽ കയറ്റി യാത്ര തുടർന്നു. കാറിനു പുറത്തു നിന്നപ്പോഴേ അതിലൊരാൾ എന്നോട്

“മകൻ എവിടെ ? സുഖമാണോ ?”

എന്നൊക്കെ ചോദിച്ചു . ഞാൻ മറുപടി പറഞ്ഞു മുന്നോട്ടു പോയി .അവർ എന്റെ ജോലി എന്താണെന്ന് ചോദിച്ചു . എയർലൈനുകൊടുക്കാൻ വച്ചിരുന്ന ബിൽ അവരെ കാണിച്ചു . വളരെ സന്തോഷമായി അവർക്കു . അടുത്ത ചോദ്യം വന്നു ,

”അവിടെ ഞങ്ങൾക്ക് എന്തെങ്കിലും ജോബ് വേക്കൻസി ഉണ്ടോ ? “

ഞാൻ ഒരല്പനേരം മൗനം പാലിച്ചു . പിന്നെയും ഒരു ബുദ്ധിമുട്ടും ഇല്ലാതെ അവർ അങ്ങോട്ടുമിങ്ങോട്ടും സംസാരിച്ചിരുന്നു .പരസ്പരം ചിരിച്ചും , വർത്താനം പറഞ്ഞും പെട്ടെന്ന് ഉള്ളൂർ എത്തി . ഇറങ്ങുന്നതിനുമുന്നെ ഒരാൾ വീണ്ടും അതെ ചോദ്യം ആവർത്തിച്ചു .

“ജോബ് വേക്കൻസി ഉണ്ടോ ?”

മറുപടിയില്ലാത്തതിനാലാണ് ഞാൻ മൗനം പാലിച്ചതെന്നുകരുതി കൂട്ടത്തിൽ ഉണ്ടായിരുന്ന ഒരാൾ പകുതി എനിയ്ക്കു മനസിലാകുന്നവിധം പറഞ്ഞു . ഞാൻ ഞെട്ടിപ്പോയി അക്കൂട്ടത്തിൽ അല്പമെങ്കിലും സംസാരിയ്ക്കാൻ കഴിയുന്ന ഒരുമോളാണ് ആ സെന്റൻസ് എനിയ്ക്കു പറഞ്ഞുതന്നത് .

“ഇന്ന് കോളേജിലെ ലാസ്റ്റ് ഡെയ് ആണ് . ഞങ്ങൾ ജോബ് നോക്കുന്നുണ്ട് . എയർപോർട്ടിൽ സംസാരിയ്ക്കാൻ കഴിയാത്തതിനാൽ നമുക്ക് ജോബ് ഒന്നും കിട്ടില്ല അല്ലെ ?”.

എന്നോട് വർത്താനം പറഞ്ഞ മോൾക്ക് അൽപ്പം സംസാരിയ്ക്കാനാകും , പൂർണമല്ല , പക്ഷെ കേൾക്കില്ല . വേറെ എന്നോടൊപ്പം നിൽക്കുന്ന ആരും പുറത്തെ ശബ്ദകോലാഹലങ്ങളോ അട്ടഹാസമോ ചിരിയോ ഒന്നും അവർ കേൾക്കുന്നില്ല .

ഞാൻ അവരോടു ആഗ്യം കാണിച്ചും മറ്റും പറഞ്ഞത് അവർക്കു മനസ്സിലായിക്കാണും , എന്റെ ചുണ്ടനങ്ങുന്നതൊക്കെ നോക്കിയാണ് ഞാൻ പറയുന്നതവർ മനസിലാക്കിയത് .

ഞാനൊരു സെൽഫി എടുത്തോട്ടെ എന്ന് ചോദിച്ചു , അവർ അത് സമ്മതിച്ചു . നിങ്ങളെക്കുറിച്ചൊന്നു എഴുതിക്കോട്ടെ എന്നുചോദിച്ചു . അതും അവർ സമ്മതിച്ചു .

എനിയ്ക്കു കൈവീശി നടപ്പാതയിലൂടെ വരിവെച്ചവർ ആറുപേരും അവരുടെ ഭാഷയിൽ സംസാരിച്ചു നടന്നുമാറി . ഞാൻ ഒരു നിസഹായനായി തിരികെ കാറിൽ കയറി . അവർക്കുവേണ്ടി കാർ നിർത്തിയപ്പോൾ തന്നെ ഓഫ് ചെയ്ത എഫ്. എം ,പിന്നെഞാൻ ഓൺ ചെയ്തില്ല .നിശബ്ദമായ കാറിൽ ഞാൻ എന്നത്തെയുംപോലെ വീട്ടിലേയ്ക്കു ,ഒരേയൊരു ചോദ്യം മാത്രം ബാക്കിയാക്കിയിട്ടു,

“സംസാരിയ്ക്കാൻ കഴിയാത്തതിനാൽ ഞങ്ങൾക്ക് അവിടെ ജോബ് കിട്ടില്ല ! അല്ലെ ?”

NB.

ഈ ഫോട്ടോയിൽ കാണുന്ന ആരുടേയും പേരെനിയ്ക്കു അറിയില്ല. നിഷ് നാഷണൽ ഇൻസ്റ്റിറ്റ്യൂട്ട് ഓഫ് സ്പീച് ആൻഡ് ഹിയറിങിലെ കുട്ടികളാണിവർ .

റോഡ് സൈഡിൽനിന്ന് അപരിചിതരായ ആൾക്കാരെ കാറിൽ കയറ്റുന്നതും , അപരിചിതരുടെ കാറിൽ കയറുന്നതും തെറ്റാണ് എന്ന് അറിയാം .

ഇവരുടെ മുന്നിൽ ,എനിയ്ക്കും ,ചിലപ്പോൾ അവർക്കും ,അത് ശെരിയായിരുന്നിരിയ്ക്കാം .

അവരും നമ്മളെപ്പോലെ തന്നെയാ എന്തെങ്കിലും ചെയ്തുകൊടുക്കണമെന്നുണ്ട് ,പക്ഷെ എന്ത് ?എന്നത് ഇപ്പോഴും ഒരു ചോദ്യചിഹ്നമാണ് .

കാരണം അവരുടെ പ്രാർത്ഥനയ്ക്കും , പുഞ്ചിരിയ്ക്കും അത്രയേറെ ഓർമ്മപ്പെടുത്തലുകളുണ്ട് . 😌😌😌

ഒരു ഒന്നൊന്നര സൗഹൃദക്കൂട്ടായ്മ

ഞാൻ പഠിച്ചതും ,വളർന്നതും ഒക്കെ ഒരു ചെറിയ ഗ്രാമത്തിലായിരുന്നു ,സാഹചര്യവും ജോലിയുമൊക്കെ സിറ്റി യിലേക്ക് ചേക്കേറാൻ പ്രേരിപ്പിച്ചു . അവിടെ സ്കൂളിൽ ഒപ്പം പഠിച്ചവർ ഒരുപാട് പേർ ഉണ്ട് സുഹൃത്തുക്കളായിട്ടു , സഹോദരങ്ങളായിട്ടു .

അതിൽ ഒരു കാര്യം ഉണ്ട് . പത്താം ക്ലാസ് കഴിഞ്ഞപ്പോൾ പലരും പല പല സ്കൂളുകളിലേക്ക് പോയി . പ്ലസ് ടു വിനു ഒരുപാട് പുതിയ കൂട്ടുകാർ പല സ്കൂളുകളിൽ നിന്നും വന്നു . പലരും പല പല ക്ലാസ്സുകളിലേയ്ക്ക് മാറ്റപ്പെട്ടു . കുറെ പേർ സുഹൃത്ബന്ധം നില നിർത്തി . പിന്നെ കോളേജ് ഒക്കെ ആയി മൊത്തത്തിൽ പലവഴി പിരിഞ്ഞു . രണ്ടോ മൂന്നോ പേരിൽ കൂടുതൽ സുഹൃത്തുക്കൾ ഉള്ളവർ തന്നെ ചുരുക്കം . പലരും വിവാഹം കഴിഞ്ഞു കുട്ടികളും പ്രാരാബ്ധവും ഒക്കെ ആയി ചടഞ്ഞു കൂടി .

വല്ലപ്പോഴും അവിടെയും ഇവിടെയുമൊക്കെ വച്ച് ആരെയെങ്കിലുമൊക്കെ കണ്ടാൽ കണ്ടു , അത്രയൊക്കെ തന്നെയായിരുന്നു മൂന്നു വർഷത്തിന് മുൻപുവരെ .

പത്താം ക്ലാസ് കഴിഞ്ഞ സമയത്തു മൊബൈൽ ഫോൺ ഒന്നും ഇല്ല . ആകെ ലാൻഡ് ഫോൺ ഉണ്ട് . എന്നാലും എല്ലാപേർക്കും അതൊന്നും ഇല്ലായിരുന്നു. ആർക്കും ആരെയും ഒരു പിടിയും ഇല്ലാതെ പത്തു പതിനാറു വർഷം ഗമയിൽ അങ്ങനെ പോയി .

അങ്ങനെ സമാധാന പരമായി കാര്യങ്ങൾ മുന്നോട്ടു പോകുമ്പോൾ 2016 ഇൽ എന്റെയൊരു സുഹൃത്ത് ഫേസ്ബുക് വഴി ഫ്രണ്ട് റിക്വസ്റ്റ് അയച്ചു ,അക്‌സെപ്റ്റ് ചെയ്ത ഉടനെ

“ അളിയാ സുഖമാണോ ? എവിടാ എന്താ വിശേഷം “

അങ്ങനെ നിർത്താതെ കുറെ ചാറ്റ് ചെയ്തു . വളരെ സന്തോഷം തോന്നി അന്ന്. പക്ഷെ പിന്നീട് അങ്ങോട്ട് അവന്റെ ഫേസ്ബുക് ഇൽ , അവന്റെ പശു , അവന്റെ അളിയൻ , അവന്റെ ടൂർ , അങ്ങനെ ഡെയിലി പോസ്റ്റ് ന്റെ ബഹളം .

“ശെടാ ഇവനൊരു ശല്യമായല്ലോ എന്നുവരെ തോന്നിപ്പോയി “( പാവം അവൻ ).

ഒരു ദിവസം ചാറ്റ് ന്റെ ഇടയിൽ അവൻ എന്റെ നമ്പർ വാങ്ങി .അവനു ഒരു മെഡിക്കൽ സ്റ്റോർ ഉണ്ട് , അതുകൊണ്ടു തന്നെ പലരെയും ആശാന് ഇടയ്ക്കെങ്കിലും കാണാൻ കഴിയും .

അങ്ങനെ ഇരിയ്ക്കേ ഒരുദിവസം വാട്സ് ആപ്പ് ഇൽ ഒരു പുതിയ ഗ്രൂപ്പ് . ഇവൻ അഡ്മിൻ , ഗ്രൂപ്പ് ന്റെ പേര് “ജനത 1995 – 2000 “ .അത്യാവശ്യം പത്തുപതിനഞ്ചു പഴയ കൂട്ടുകാരും ഉണ്ട് . അവൻ ഫേസ്ബുക് വഴിയൊക്കെ കുറെ പേരുടെ നമ്പർ സംഘടിപ്പിച്ചു , പിന്നെ അതിൽ ഏറ്റവും ഹൈലൈറ്റ് ഒപ്പം പഠിച്ച ഒരു കൂട്ടുകാരിയുടെ നമ്പർ കിട്ടിയതാ .

അവൾ ഒരുദിവസം മെഡിക്കൽ സ്റ്റോർ ഇൽ വന്നു , അവനു പെട്ടെന്ന് ആളിനെ മനസിലായി . അങ്ങനെ നേരെ അങ്ങ് ചോദിച്ചു

“ ഇന്നയാളല്ലേ എന്ന് “.

“ അതെ എന്ന് “

അവളുടെ മറുപടിയും .

ഒരു പേപ്പർ എടുത്തു കൊടുത്തിട്ടു

“ നിന്റെ കോണ്ടാക്ട് നമ്പർ ഇതിൽ എഴുതു “.

അവനെ കണ്ടു പേടിച്ചിട്ടാണോ അതോ ‘സൈക്കോളജിക്കൽ’ മൂവ് ആയിരുന്നോ എന്ന് അറിയില്ല , അവൾ ഒരു അക്കം പോലും തെറ്റാതെ നമ്പർ എഴുതികൊടുത്തിട്ടു വീട്ടിൽ പോയി .

അവൾക്കു ഇത്ര ധൈര്യം എവിടുന്നു വന്നു എന്നല്ലേ ? കാൾ ചെയ്തപ്പോഴല്ലേ കാര്യം മനസിലായെ , കേരള പോലീസ് ഇൽ ആണ് ജോലി ,അവളുടെ ഒഫീഷ്യൽ നമ്പർ ആണ് എഴുതി കൊടുത്തത്.

മുജ്ജന്മ സുകൃതം , “ഇടി “കിട്ടാത്തത് .

അങ്ങനെ ഗ്രൂപ്പ് വളരെ അതികം ഭംഗിയായി മുന്നോട്ടു പോയി .തുടക്കതിലെ എക്സൈറ്റ്‌മെന്റ് ഒരു രക്ഷയും ഇല്ലായിരുന്നു . പാതിരാത്രി വരെ എല്ലാപേരും ഓൺലൈൻ കാണും . വിശേഷങ്ങൾ പങ്കു വയ്ക്കും . പലർക്കും പലരെയും അത്ര നന്നായി അറിയില്ല . പക്ഷെ എല്ലാപേരും ഒപ്പം പഠിച്ചതാണ് .പിന്നെ അങ്ങോട്ടും ഇങ്ങോട്ടും അറിയാതിരിയ്ക്കാൻ ഒരുപാട് കാരണങ്ങളുണ്ട് , ട്യൂഷൻ സെന്റർ ഇൽ മാത്രമാണ് ആൺകുട്ടികളും ,പെൺകുട്ടികളും ഉള്ളു . സ്കൂൾ ഇൽ ക്ലാസ് സെപറേറ്റ്ആണ്.

കുറെ പേർ പോലീസ് ഇൽ , കുറച്ചുപേർ സ്വന്തം ബിസിനസ് , ആർ .ടി . ഓ ഓഫീസർ,ഡോക്ടർ,പട്ടാളം ,ഫയർ ഫോഴ്സ് ,അധ്യാപകർ,പൊതു പ്രവർത്തകൻ ,പഞ്ചായത്തഗം , പ്രവാസികൾ, ഓട്ടോ ഡ്രൈവേഴ്സ് എന്ന് വേണ്ട സമൂഹത്തിന്റെ നാനാ തുറയിൽ ജോലിചെയ്യുന്നവർ ഒരുമിച്ചു ഒരു കുടുംബമായി . നാനാ ജാതി മതസ്ഥർ , പല രാഷ്ട്രീയ ചിന്തകൾ ഉള്ളവർ , പക്ഷെ ഒരൊറ്റക്കെട്ടായി ഇപ്പോഴും ഒരുമിച്ചു .

ആദ്യമായി എല്ലാപേരും സ്കൂളിൽ തന്നെ ഒരുമിച്ചുകൂടി . കുറച്ചുപേർ മാത്രമേ ഉണ്ടായിരുന്നുള്ളു . അവർ ഫോട്ടോസ് ഒക്കെ ഗ്രൂപ്പ് ഇൽ ഷെയർ ചെയ്തു .

അങ്ങനെ പലപ്പോഴായി പല കാര്യങ്ങൾക്കു ഒരുമിച്ചു കൂടി . അങ്ങനെ ഗ്രൂപ്പ് വളരെ സജീവമായി .കൂടെ പഠിച്ചവരിൽ ബുദ്ധിമുട്ടുന്നവരെ സഹായിക്കുക ,മരണപ്പെട്ട അധ്യാപകരുടെ കുടുംബത്തെ സഹായിക്കുക ,അങ്ങനെ ഈ ഗ്രൂപ്പ് വഴി കുറെ ഏറെ നല്ല കാര്യങ്ങൾ ചെയ്യാൻ കഴിഞ്ഞു .ഏറ്റവും സന്തോഷം കൂടെ പഠിച്ച ഒരാളിന്റെ കല്യാണത്തിന് കൂടാൻ കഴിഞ്ഞു (. അവൻ ഇപ്പോഴും കൊച്ചു ചെക്കനാ , അതാ ഒരൽപം ലേറ്റ് ആക്കിയേ🤪).

പാലുകാച്ചു , കെട്ടിയോന്മാർ ഗൾഫ് ഇൽ നിന്ന് വരുന്നതിനു ,പ്രസവം ,നൂലുകെട്ടു ,ബർത്ഡേയ് , ഓണം , പെരുന്നാൾ , ക്രിസ്മസ് ,ഇടയ്ക്കു ചെറിയ ചെറിയ ടൂർ അങ്ങനെ എല്ലാ കാര്യത്തിലും ഇതിൽ കുറെ മുഖങ്ങൾ സ്ഥിരം കാഴ്ചയായി .

കാലത്തിനനുസരിച്ചു കുറെ മാറ്റങ്ങളുണ്ടായി ,ഫ്രണ്ട് ബഞ്ച് ഇൽ സർ നെ പേടിച്ചു , വരുന്നവന്റെയും ,പോകുന്നവന്റെയും , തൊട്ടപ്പുറത്തെ ക്ലാസ് ലെ പിള്ളേരുടെ വരെ ഇടി ഫ്രീ ആയി ,ഒരു മടിയും ഇല്ലാതെ വാങ്ങിയവരൊക്കെ , കണ്ണൊക്കെ ഉരുട്ടി ഭാര്യയേയും മക്കളെയും പേടിപ്പിയ്ക്കുന്നു . പണ്ട് സ്കൂളിൽ പോലീസും കള്ളനും കളിച്ചു നടന്നപ്പോൾ സ്ഥിരം കള്ളനായി നടന്നിരുന്നവൻ ഇപ്പൊ കലിപ്പ് പോലീസ്.

നെഞ്ചോക്കെ ഒട്ടി എക്സ്റേ പോലെ ഇരുന്നവർ സിക്സ് പാക്ക് ഒക്കെ ആയിരിക്കുന്നു ,പലരും വയറൊക്കെ ഒട്ടി ‘കുടം ‘പോലെ ആയിരിക്കുന്നു , ചിലരൊക്കെ മെലിഞ്ഞു ‘വൈക്കോൽത്തുറു ‘പോലെ ആയിരിക്കുന്നു . പണ്ട് എല്ലാ വിഷയത്തിനും നല്ല മാർക്കുവാങ്ങുന്ന എന്നാൽ ഹിന്ദിയ്ക്കു ഒരൽപം ബുദ്ധിമുട്ടുള്ള സുഹൃത്ത് കൂട്ടത്തിൽ ഉണ്ടായിരുന്നു , ടെസ്റ്റ്പേപ്പറുകളിൽ ജയിക്കാനായി ‘സരോജിനിയമ്മ ‘ടീച്ചറിന്റെ കയ്യിൽ നിന്നും കടം വാങ്ങിയ മാർക്ക് ഇനിയും കൊടുത്തിട്ടില്ല ,ആ അവൻ ഇപ്പൊ പട്ടാളത്തിലാ , ഹിന്ദി ‘ബുലാത്തുന്നതു ‘കേട്ടാൽ ‘പെറ്റ തള്ള ‘സഹിയ്ക്കില്ല . നമ്മളിപ്പോഴും ബംഗാളി പണിക്കാരോട് പിടിച്ചുനിൽക്കാനുള്ള വെറും

“ ക്യാ ഭായ് “

ഇൽ നിൽക്കുന്നതെ ഉള്ളു .മൊത്തത്തിൽ ഭയങ്കര മാറ്റം .

ഒന്ന് വായ തുറന്നു കണ്ടിട്ടില്ലാത്തവർ നന്നായി വർത്താനം പറയുന്നു .ചുരുക്കിപ്പറഞ്ഞാൽ എല്ലാം കൂടി കൂടിയാൽ കാക്ക കൂട്ടിൽ കല്ലുവാരി ഇട്ട ഫീലാണ് . പിന്നെ ആഹാര കാര്യത്തിൽ നല്ല ഒത്തൊരുമയാണ് ,’വായ തുറന്നാൽ കാക്ക കൊത്തും , അതാണ് ഒരു അളവ് ‘.വീട്ടിൽ കയറി ഗ്രൂപ്പ് അഡ്മിൻ ന്റെ പശുവിന്റെ പാൽ കറന്നുകൊണ്ടു പോകാൻ ധൈര്യമുള്ള സുഹൃത്തുക്കളുമുണ്ട് കൂട്ടത്തിൽ ( അവനു അങ്ങനെതന്നെ വേണം 🤪).

ഓരോ ഒത്തുകൂടലിലും ഒരാളെങ്കിലും ആദ്യമായി വരുന്നതായിരിക്കും .കുറെ തമാശകൾ , പൊട്ടിച്ചിരികൾ , കുറെ കുട്ടികൾ , മുട്ടിലിഴയുന്ന പ്രായം മുതൽ പ്ലസ് ഒൺ നു പഠിയ്ക്കുന്ന മക്കൾ ഉള്ളവരുണ്ട് . അതിങ്ങള് വിചാരിയ്ക്കുന്നുണ്ടാകും

“ ഈ പോത്തുപോലെ വളർന്നതൊക്കെ എന്തിനാ ഇങ്ങനെ കിടന്നു കിണിയ്ക്കുന്നതെന്നു “.

സ്കൂളിലെ വട്ടപ്പേരുകൾ തന്നെയാണ് ഇന്നും ഗ്രൂപ്പ് ലെ വിളിപ്പേരുകൾ . നേരിട്ട് കണ്ടാലും വലിയ വ്യത്യാസമൊന്നുമില്ല , ഞങ്ങൾക്കാർക്കും ഒരു പരാതിയും ഇല്ല പരിഭവവും ഇല്ല .

സ്കൂൾ ജീവിതം ഒക്കെ കഴിഞ്ഞു ഇപ്പൊ പത്തൊൻപതു വർഷത്തിന് ശേഷം ഇങ്ങനെ ഒരു ഐക്യത്തോടെ പോകാൻ കാരണം ഒന്നേ ഉള്ളു ,

നല്ല കട്ടയ്ക്കു കൂടെ കൂടുന്ന കെട്ടിയോന്മാരും ,കെട്ടിയോളുമാരും

.( കട്ട കലിപ്പ് സീൻ അല്ലെ )

സ്പെഷ്യൽ താങ്ക്സ് – (അന്ന് ഈ ഗ്രൂപ്പ് ചെയ്യാൻ മനസുകാട്ടിയ ആ വലിയ മനുഷ്യനും ,അതിലെ സജീവ ചലപ്പറകളായ ഞാനടങ്ങുന്ന നൂറോളം വരുന്ന മറ്റു സുഹൃത്തുക്കൾക്കും , അവരുടെയൊക്കെ നല്ലവരായ ഭർത്താക്കന്മാർക്കും ഭാര്യമാർക്കും )

“”ജയ് ,ജനത 1995 – 2000 “”

(ജനത സ്കൂളിന്റെ പേരാണ് )

NB- ഒരു തീപ്പൊരി മതി ഈ ലോകം വെന്തു വെണ്ണീറാകാൻ ,അപ്പോഴാണ് നൂറിൽ താഴെ മെംബേർസ് ഉള്ള ഒരു ഗ്രൂപ്പ് ,കണ്ണേറിൽ നിന്ന് നീതന്നെ നിന്നെ കാത്തോളണേ വാട്സാപ്പ് ദൈവങ്ങളെ 🤪🤪

ഈ ഗ്രൂപ്പ് ന്റെ ഐശ്വര്യം “ചാളമേരി “ആൻഡ് ടീം 🧜‍♀️

“ ദി പയമ്പൊരി & ദി മത്സ്യക്കറി “ ⭐️⭐️⭐️

കണ്ണൂർ , പുതിയ എയർപോർട്ടിൽ ജോലി സംബന്ധമായി വന്നതാണ് .മട്ടന്നൂർ ആണ് താമസം , നല്ല നാട്ടിൻപുറം . കണ്ണൂർ നിന്ന് മുപ്പതു കിലോമീറ്ററോളം ദുരയാണ് മട്ടന്നൂർ. മട്ടന്നൂർ നിന്ന് നാല് കിലോമീറ്റർ ആണ് എയർപോർട്ട് . കൊച്ചൊരു ഗ്രാമം , എട്ടുമണിയ്ക്കു ഉണരും , പത്തുമണിയോടെ ഉറങ്ങുന്ന ഗ്രാമം , ഇവിടെയുള്ളവരുടെ പട്ടണമാണ് കണ്ണൂർ .

പക്ഷെ ഇവിടെ വന്ന അന്ന് മുതൽ നമ്മൾ മട്ടന്നൂർകാര .എന്തുനല്ല ആൾക്കാരന്നോ ഇവിടെ , ഭയങ്കര ഹെല്പിങ് മെന്റാലിറ്റി ഉള്ള ആൾക്കാർ .പിന്നെ സാധാരണ തെക്കന്മാർ എന്നുപറഞ്ഞാൽ പുച്ഛമാണെന്നൊക്കെയാ എല്ലാപേരും പറഞ്ഞു ഞാൻ കേട്ടിട്ടുള്ളത് . പക്ഷെ ഒരാളുപോലും അങ്ങനെ പെരുമാറി കണ്ടതേയില്ല. സാധാരണ ഒരു സിറ്റിയിൽ കിട്ടുന്ന എല്ലാം ഇവിടെ ഉണ്ട് .

ഹോട്ടൽ ആണ് ബഹുരസം , തട്ടുകടയായാലും 3 സ്റ്റാർ ഹോട്ടൽ ആയാലും ആഹാരത്തിനു ഒരേ ടേസ്റ്റ് തന്നെയാ . പിന്നെ ധൈര്യമായി ഏതു തട്ടുകടയിൽ വേണമെങ്കിലും കയറി ആഹാരം കഴിയ്ക്കാം , കാരണം നമുക്ക് തരുന്നത് ‘നല്ല ആഹാരത്തിന്റെയും സ്നേഹത്തിന്റെയും ഒരു കോമ്പിനേഷൻ ആണ് ‘.

താമസിയ്ക്കുന്ന വില്ലയുടെ തൊട്ടടുത്തൊരു ചെറിയ കടയുണ്ട് ,ഷെരീഫിക്കാന്റെ ചായ പീഡിയ . ഇക്ക 5 മണിയ്‌ക്കെത്തും , 6 . 30 ആകുമ്പോ സഹായത്തിനു മോനും എത്തും . രാവിലെ തന്നെ ചെറിയ ചില്ലിട്ട അലമാരയിൽ “ എണ്ണക്കടികൾ സ്ഥാനം പിടിയ്ക്കും “. പിന്നെ എട്ടുമണിയോടെ നെയ് പത്തൽ, നൂലപ്പം , വെള്ളയപ്പം , ഉണ്ടക്കായ ,ഈത്തപ്പയം ബോണ്ട , ഹൈലൈറ്റ് “ പയമ്പൊരി “. നല്ല ചൂട് പയമ്പൊരി , നല്ല കറുമുറെ ചവയ്ക്കാൻ പറ്റുന്ന മൊരിഞ്ഞ ‘പയമ്പൊരി ‘. നടന്നിട്ടു വരുമ്പോ ഒരു ചായയും പയമ്പൊരിയും കഴിയ്ക്കും അവിടുന്നു.

അതിരാവിലെ അവിടെ ‘മത്സ്യക്കറിയാണ് ‘മറ്റൊരു ഹൈലൈറ്റ് ,നൂലപ്പമോ , പത്തലോ എന്ത് പലഹാരത്തിനൊപ്പവും മത്സ്യക്കറി കഴിയ്ക്കും .ആഹാരത്തിനൊക്കെ എന്നാ ടേസ്റ്റ് ആണെന്നോ , സാധാരണ എവിടെയെങ്കിലും പോയാൽ തിരികെ വരുന്ന ദിവസം , നല്ല ഊണും മീൻ കറി യും ഒക്കെ ഉണ്ടാക്കി വയ്ക്കാൻ ശ്രീമതിയെ വിളിച്ചു പറയുകയാണ് പതിവ് . പക്ഷെ രണ്ടുപ്രാവശ്യം ഇവിടെ വന്നുപോയിട്ടും ആഹാരത്തിനൊരുമുട്ടും വരുത്തിച്ചില്ല .

നല്ല കരിക്കിൻ ജ്യൂസ് ഉം പുട്ടും പോട്ടിയും, പുട്ടും കൂന്തലും , പുട്ടും കല്ലുമ്മക്കായ മിക്സ് ഉം ഒക്കെ കിട്ടുന്ന മറ്റൊരു ഹോട്ടൽ . അവിടെ നമുക്ക് ‘ചവച്ചു’ തരുന്നില്ല എന്നെ ഉള്ളു ബാക്കി എല്ലാം നല്ല സൂപ്പർ ആയി മിക്സ് ചെയ്തു ,പച്ചമുളകും ,നല്ല മണമുള്ള കറിവേപ്പിലയും , കുറച്ചു ഉള്ളിയുമൊക്കെ മുകളിൽ വിതറിയങ്ങു മുന്നിൽ വയ്ക്കും ‘ പുട്ട് ഏതാണെന്നു മിക്സ് എന്താണെന്നോ അറിയില്ല ‘( നാവ് ഇടയ്ക്കു വലിച്ചു പുറത്തിട്ടില്ലേൽ അങ്ങ് ഇറങ്ങിപ്പോകും “ .

പിന്നെ ആഹാരം പ്രെസന്റ്‌ ചെയ്യുന്ന രീതി അതിഗംഭീരം, കഴിച്ചുപോകും . ഉപ്പുമാവ് പാക്ക് ചെയ്താണ് തരുന്നത് . ചെറിയൊരു ഇലയിൽ പൊതിഞ്ഞു തരും . വീട്ടിൽ കാലുമടക്കി അടിയ്ക്കുന്ന ഐറ്റം ആണ് “ഇലയപ്പം “. പേരുമാറ്റി‘ഇലയട’എന്നാക്കി ,ശർക്കരയൊക്കെ ഉരുകി,ഒഴുകി യിറങ്ങുന്ന ഐറ്റം ആയപ്പോ രണ്ടുമൂന്നു എണ്ണം ഒരു പരാതിയും പരിഭവവും ഇല്ലാതെ ഇറങ്ങിയങ്ങു പോകും .

ബിരിയാണിയെപ്പറ്റി ഞാൻ ഒന്നും പറയുന്നില്ല , തൊട്ടടുത്ത ജംഗ്ഷനിൽ നിന്നാണ് ‘തലശേരി ദം ബിരിയാണി’യുടെ ഉൽപ്പത്തി എന്ന് അറിയുമ്പോൾ, “ രാജസ്ഥാനിൽ വന്നിട്ട് നല്ല സൂപ്പർ മണൽ കിട്ടും എന്ന് ആരോടും പറയണ്ടല്ലോ “.

വഴിയിൽ കണ്ടു പരിചയപ്പെട്ടവരും , ഹോട്ടലുകളിലും കടകളിലും കണ്ടവരും ഒന്നേ പറഞ്ഞുള്ളു ,

“ ഞങ്ങൾ സ്നേഹിച്ചാൽ നക്കിക്കൊല്ലും, ദ്രോഹിച്ചാൽ ഞെക്കിക്കൊല്ലും “.

NB –

ചായ – 8 രുപ

എണ്ണക്കടി – 8 രുപ

നെയ് പത്തൽ – 8 X 2 = 16 രുപ

മത്സ്യക്കറി – 15 രുപ ( 2 മത്തി, ഷെരീഫ് ഇക്കാക്ക് സ്നേഹം കൂടിയാൽ എക്സ്ട്രാ ഒരെണ്ണം കൂടി )

അങ്ങനെ ആകെമൊത്തം – 47 ക 🤪

( വയറും മനസും ഒരേ അളവിൽ നിറയും ).

പേര് മട്ടന്നൂർ എന്നാണെങ്കിലും , ഒരിടത്തുനിന്നും ‘മട്ടൺ’കിട്ടിയില്ല

( അടുത്ത പരിശ്രമം അതിനാകട്ടെ )

‘കോളോണിയലിസവും , പ്രതിക്രിയവാതകവും ‘എന്നൊക്കെ തോന്നിയെങ്കിൽ ക്ഷമിയ്ക്കണം ,കണ്ണൂരിൽ ,

“ഈടെ ഇങ്ങനാണപ്പ “